Market Insight：國企改革題材選擇多

進入下半年，似乎多番啲關於國企改革的消息。就如先前關於煤電行業的重組消息；繼而是近日傳來中國中材集團與中國建材集團的資產重組，最新係中國鋁業（02600）披露重組消息，股價即飆6%。

中旅留意收集機會

其實，除咗電力、建材及金屬業外，圍繞石油、天然氣、鐵路、民航、電訊及軍工等領域，都係國企改革的重點行業，具體港中旅與國旅、中電投與國核、五礦與中冶、招商局與中國外運長航、中糧與中紡、寶鋼與武鋼等等的進度，都值得投資者高度注視。

講開又講，見隻股價長期低迷的香港中旅（00308），近月股價由八月下旬2.2元水平，反覆升抵近日高位2.83元，乃一五年大時代以來最強升浪，主要係上月底公布中期純利升38%，且披露擬出售香港物業，並擬分拆內地景區項目喺A股上市。

管理層終於肯着手重整資產，釋放資產價值，投資者當然高興。以現價計，市帳率才1倍，中長線有得諗，不妨留意短期整固的收集機會。

汽車板塊炒得似模似樣

昨日市況唔可以唔提汽車股，內地擬在一定限期前全面轉用新能源汽車的消息繼續發酵，比亞迪（01211）急升10%，似乎班大戶真係好認真咁看待呢個消息。古勝都係嗰句，板塊要認認真真大炒一轉，就要睇龍頭股表現，今轉又似乎有幾成真！

其實，近年不少海外大型車廠都押注內地電動車市場。理論上，具傳統汽車生產技術的海外傳統車廠，在產品研發方面會有優勢。內地亦深明掌握自主技術研發的重要性，故政策向本土車企傾斜，並重視自主技術，努力栽培本土純電動車企的成長。只是，在政策推出的初期，有企業渾水摸魚騙補，經歷近兩年的整頓過後，相信電動車行業可更健康發展。

不過，要押注新能源汽車市場，在下重申兩大選股條件，第一，為本土車企；第二係擁有整車及電池等一條龍產業鏈。如果想冷敲，就加埋第三個條件，擁有工信部所發出的新能源汽車生產資質的純電動車企。咁即係點？自己做吓功課啦！

手機設備股撐龍頭

蘋果公司發布新iPhone前夕，相關概念股仍有炒作，舜宇光學（02382）股價飆到上119.3元創新高，已完全走出失落「染藍」的陰影；瑞聲科技（02018）亦一度高見143.1元；高偉電子（01415）升5%報4.58元。

至於昨日中午復牌的丘鈦科技（01478），股價未受下調全年鏡頭出貨量指引的消息拖累，股價低開見13.94元迅即向上攻，高見16.4元，收報15.4元，升9%，僅半日交易，成交已達11.5億元。

講到呢隻丘鈦，股價由七月初7.8元水平，炒到上八月底高位見23.25元，累積升幅兩倍。咁炒法調整自然難免，停牌前股價落番14元水平，復牌股價做好亦只能看待成急跌後的反彈。停牌前是否有春江鴨聞風先遁，不得而知，但照計呢隻股高位肯走唔係冇機會。至於話現價值唔值博，此股波幅頗大，少啲心血都頂唔順，在下都係鍾意從龍頭股入手。

古勝