絲絲講場：中銀紀念金條千金難求

限產百條 每條36萬

今次中銀香港推出百年紀念金條重1公斤（千克），按照現時金價，每條金條價值約36萬，金條背面都有個百年行慶標識同獨有編號，收藏價值都好高吓。不過發行量咁少，睇怕幾難搶。

驚搶唔到咁重型嘅紀念金條？仲有其他選擇，中銀香港其實四月已經推出咗10克同100克百年紀念金牌，發行量分別係兩萬同1萬個，一樣係9999足金，同樣有百年行慶標識與獨有編號。嗱，聽講現時仲有貨，不過始終係限量。

講開金，除咗實體金外，點可以唔提好多投資者都鍾意嘅紙黃金，中銀香港個人金融及財富管理部助理總經理張穎思就話，因為地緣政治風險升高，加上國際金價由年初每安士見1,100美元升至現時1,300美元左右，因此唔少投資者都持觀望態度，導致今年至今交易量跌咗15%！

不過講到金，絲絲更愛金磚，冇錯係愛金女，又如何！

余絲韻