Market Insight：地產股趁高酌量食胡

守株待兔，古勝終於等到上周五等到地產股追落後，信和置業（00083）孖埋尖沙咀置業（00247）賣成都資產套現過百億，再嚟政府計劃推出「港人首置上車盤」，放風郊野公園起樓，同時合作加快在新界農地興屋。

券商大合唱睇好地產股，押注未來農地改用途補地價進度會爽手好多，幾隻本地地產股，尤其揸住最多農地的新鴻基地產（00016）、恒基地產（00012）及新世界發展（00017）炒到二三線股一樣，即使尾段升少咗，埋單計都升4%、5.8%及5.6%。

當然，點同政府傾合作，地價點補法，要搞幾耐都係未知之數，新一屆政府擺出積極姿態增加供應，搞埋平價上車盤變相同地產商爭利，惟股票要炒起上嚟，大家當然闊佬懶理。

在下重申，依然十二分睇好本地地產股，至少今年內睇法都唔會變，不過，如果大家心水清，近半年每次見基金經理無乜炒作古仔跟，而一窩蜂追落去本地地產股，都係大市短期升浪去到水尾的表現。如果今日返嚟仲有高位食胡機會，不妨減住多少，相信過兩三個星期應該大把時間低啲再買過。

iPhone概念炒到水尾

愈來愈近蘋果公司九月十二日的新產品發布會，iPhone 8傳言滿天飛，權威美媒話製造程序可能有啲阻滯，可能引致初期付運延誤，九月下旬果粉們未必收到新機咁話。

消息一出，相關概念股應聲倒地，舜宇光學（02382）上周五跌2.7%收報108元，瑞聲科技（02018）跌1%收報136元，最傷係丘鈦科技（01478），重挫9.7%報16.42元，通達（00698）跌2.5%報2.31元。

即使iPhone十周年的新機再勁，過去幾個月的炒作，點計都充分反映晒喺幾隻概念股身上，聽晚已經去到發布會，蘋果公司股價踏入九月已經日日高開低收，沽壓唔細，相關概念股的捧場客，唔係諗住要上埋甜品至散席嘛。

當炒板塊買少見少

業績期炒完，股王騰訊（00700）公布業績後反高潮，對手阿里巴巴在美國亦一樣，股價似被點穴，連地產股都落埋鑊，九月個市可捧場的板塊似乎係愈來愈少。

置富博財息兼收

近排「侵侵」政府醫得頭嚟腳又痛，財政懸崖因為風災影響，國會擺出以和為貴姿態，拖多三個月，但趕今年通過的稅改居然仲未有下文。四分五裂的「侵侵」政府，執行力令人懷疑。

聯儲局方面，明年二月耶倫任期屆滿，殊不知副手費希爾上周遞信請辭，聯儲局高層短期大洗牌難免，即使照原定計劃展開縮表，但中長線貨幣政策的不明朗因素突然大增。美金散晒外，十年期美債孳息近日輾轉落到2厘邊緣，反映債商眼中，息口上調周期可能已進入尾聲，甚至已結束。

弱美元及加息預期降低，高息及資產再膨脹下受惠的股份又可睇高一線。

地產股短期搶得急，不如睇番啲房託基金，上周五領展（00823）即市由10日及20日線樓下殺番上近高位收64.7元，睇嚟破65元阻力指日可待。

今浪隻置富產業信託（00778）相對落後，七月底見9.56元高位後，反覆在9至9.4元間浮沉，估計今年有5.5厘息，若無心水，可將錢泊住落去先，博財息兼收都得。

古勝