Market Insight：板塊輪動 資金四圍走

美國幣策添不明朗

睇見風災嚴重，美國國會同「侵侵」再過唔去，都唔會咁笨揀依家挾國債上限殺到埋身借題發揮。周三晚狂人同國會領袖會面後，債限死線順利延遲三個月。當以為短期最不明朗政治危機成功拆彈，轉個頭仲有八個月任期屆滿的聯儲局副主席費希爾以私人理由請辭。

另外，聯儲局主席耶倫任期喺明年二月屆滿，短短半年聯儲局第一、二把交椅齊齊退下火線，如無意外，聯儲局九月開始縮表，之後搵邊個重量級人物坐鎮，開始縮表之後貨幣政策會唔會變成「無人駕駛」，未來隨即變得極不明朗。

美金跌，美股升些少，恒指精神領袖騰訊（00700）唔精神，令短期恒指再破頂變得困難。不過，炒鬼東家唔炒炒西家，內房、汽車甚至石油股都相繼落鑊，短期似乎都係炒股唔炒市的形勢。

北水炒股發揮威力

內房升到唔識停，中國奧園（03883）、雅居樂（03383）、中海宏洋（00081）、萬科（02202）、碧桂園（02007）、合景泰富（01813）、世茂房地產（00813）、龍光地產（03380）、融創中國（01918）等齊創52周新高。北水南下，經滬/深港通收到貨乾之後，威力正逐漸發揮。

隨着港股愈來愈A股化，唔啱中資胃口的以後幾乎可以當睇少一瓣。不過炒還炒，昨日禹洲地產（01628）趁旺市，開咗伸手要錢的第一槍，股價應聲倒地。唔怕一萬至怕萬一，如果破發，對內房股熱度或多或少會有負面影響。

吉利汽車（00175）八月份銷售9.6萬輛，按年勁升八成，出口減少21%唔緊要，內銷勁升85%，抵銷影響有凸，主要是新帝豪及遠景兩個車系的銷售帶動。累積八個月總銷量已達全年目標的65%。不過，今年累積升1.66倍唔嘢小，28倍PE在一七年業績之後，可以落到17至18倍，車股中唔算平，昨抽上20.25元雙頂遇阻，收19.42元升0.5%。睇嚟要先在18至20元消化一陣，先再有機會再上。

信置賣產釋放價值

信和置業（00083）同控股公司尖沙咀置業（00247）喺昨日收市後聯合通告，以87.67億元人民幣（約105.1億港元），向深圳華僑城出售信置（成都）八成股權，交易涉及住宅、商業及酒店發展項目，合共24.44萬方米樓面。

信置截至六月底止全年業績，手頭現金331.4億元，減去借貸持淨現金272.2億元，大約是股東資本的兩成一，水浸下繼續賣嘢，係準備有大project抑或純粹唔睇好內地樓市趁機食胡？古勝同大家一樣都係估估吓。

點都好，交易有助把投資價值釋放出來，今浪仲未破頂的信置，斷估都輪到佢。

古勝