周三同大家解釋過，點解我們要驚金仔，其實係怕佢擦槍走火，因而建議粉絲於九月九日北韓建國節之前別輕舉妄動。結果，恒指於周三同周四都要連跌，尤其是昨日於高開204點的情況下倒跌90點，而形成了一道近300點的陰燭，10日及20日線雙雙失守，而成交過千億。後市唔使我多講喇啩？恒指向下的目標繼續是27,000點！
恒指照足預測的方向走，但我依然有進帳，都是拜內房股所賜。除於周三已經利申過，符碌持有的中國奧園（03883）連日大爆之外，我推畀粉絲趁突破追入的雅居樂（03383）都有交代，昨日升6.8%！有貨的粉絲要揸實呀，事關內房除了中國海外（00688）同華潤置地（01109）係郁到恒指之外，其他的都同大市無乜關連。
所以話，無懼世事變改，後市都有權企硬！我睇好雅居樂，不單只是因為股價破頂，仲因為集團於下半年會推出至少五個的項目，較上半年多好多，業績肯定會靚仔。
有見於內房股大升，有好多粉絲都拎住唔同的冧巴來問我買邊隻好，我就同大家分享我揀內房股的心法啦！
我們成日都話內房的銷售數據好，到底點先至叫做好？不如等我用兩隻實力懸殊的股份來比喻：萬科企業（02202）頭八個月的銷售額係3,497.8億元人仔（折合約4,200億港紙），花樣年（01777）的銷售就係72.4億元人仔（約87億港紙）。咁樣即係點呢？係咪就代表銷售額少的就唔好？你話唔係喎，公司的規模唔同喎，邊有得比呀！
有，點會無得比呀？我會比較兩者的銷售額對市值的比例！舉個例，萬科的市值係344.5億元，銷售額比市值大12.1倍；花樣年的市值係63.96億元，銷售額比市值大1.36倍咋。睇完個數，你應該知道咩叫做貨如輪轉啦。咁你依家應該明白點解萬科的股價愈升愈有，而花樣年就於山腳啦？
富昌金融研究部總監 譚朗蔚（作者為註冊持牌人士，持有奧園）