絲絲講場：華為超蘋趕星 夢想成真
喺中國手機行業裏頭，華為消費者業務行政總裁余承東有「余大嘴」嘅綽號，皆因佢經常「口出狂言」，當中喺一三年起就經常掛在嘴邊嗰句「三年超蘋果，五年超三星」，就更加係佢嘅經典金句。殊不知東哥當日講嘅，今日真係初步實現。
手機出貨量全球第二
根據市場調研公司Counterpoint Research最新數據顯示，華為智能手機出貨量喺今年六月同七月兩個月，已經超過蘋果公司嘅iPhone。由此可見，華為首次成為全球第二大智能手機廠商。
雖然Counterpoint冇公布實際數字，但由其公布嘅出貨量走勢圖嚟睇，華為手機出貨量由三月開始一路向上，蘋果公司iPhone同期出貨量就持續下滑，而之前華為最接近蘋果出貨量嘅時間段係上年七至八月。業內分析估計，今年八月華為智能手機出貨量依舊強勁，可能連續三個月完勝蘋果。
之不過，隨住九月iPhone 8上市，蘋果出貨量睇怕又會反超華為！
余絲韻