絲絲講場：紅寶石朱古力瞄準大媽心
全世界朱古力市場規模連續兩年縮水，但全球最大朱古力生產商百樂嘉利寶（Barry Callebaut）剛宣布推出，自八十年前雀巢公司推出白朱古力之後，全世界第四種顏色嘅紅寶石朱古力（Ruby Chocolate），仲擺到明想用浪漫嚟攻陷中國大陸添！
歐睿顧問資料顯示，現時全球人均朱古力年消費最高嘅係歐洲，人均年消費達七千克；其次係美國嘅四千克，之後係日本和南韓嘅二千克。估計去到二○年，人均年消費可由依家嘅二百克增至一千克嘅中國，年消費金額可由舊年嘅一百八十五點一六億人仔，升一點二五倍到四百億人仔。
全球搞試食 揀上海推出
成個世紀以來，朱古力賣極都得三種色，即係牛奶朱古力、黑朱古力、白朱古力。家陣嘉利寶發明嘅紅寶石朱古力，係由純天然嘅紅寶石可可豆（Ruby Cocoa Bean）製成，唔係用人造色素嘅，產自科特迪瓦、厄瓜多爾同巴西。
新產品已經喺好多個國家搞試食，個個食到Lam晒脷，中國大媽反應最熱烈！所以嘉利寶公司選擇尋日喺上海正式推出呢款新品種朱古力。嘉利寶行政總裁聖阿夫里克相信，紅寶石朱古力對八○至○○年出生嘅千禧世代夠晒吸引力。
余絲韻