絲絲講場：滙控倫敦總部15歲拍片賀壽
香港人一向信奉「獅子山精神」，所指自然係香港擁有嘅一座「獅子山」，而屹立喺中環滙豐總行多年嗰兩尊銅獅，則可謂香港滙豐嘅代表。唔覺唔覺，原來轉眼間滙控（00005）倫敦總部都踏入15周年了！
近日絲絲瀏覽HSBC NOW專頁時，睇到一條慶祝15周年嘅紀念短片，入面仲分享咗幾件趣事。
萬名員工組成「聯合國」
片中講到原來依家總部有1萬名員工，比開始成立時足足多咗一倍，佢哋夾夾埋埋嚟自多過100個種族，係名副其實嘅銀行界「聯合國」！
有咁多員工，膳食供應當然唔會少啦，總部每日都會提供約2,500份食物，而嗰度嘅升降機每個月都要行約9,600公里，同絲絲喺香港飛轉去倫敦差唔多呀！點解用香港嚟計？因為香港係滙豐嘅亞洲總部囉！
除此之外，滙控倫敦總部喺環保都下咗唔少工夫！段片提到總部由一二年至今參加慳水計劃，慳番水量大約等於13個奧運游泳池，而佢哋每月都會收集成10萬個紙杯，至今都回收咗成噸紙杯啦！
余絲韻