今日我要同大家探討一個困擾了市場近半年的老問題：到底我們需唔需要驚北韓呢？一般人認為，金仔係無理由會真打美國的。事關一旦開打，先唔好理美國會有幾傷先喇，你北韓已經要喺世界上即時消失！
但金仔如無打算真打的話，咁佢又幹嘛要終日逞強？我真係諗極都諗唔明！有人話，金仔要趁九月九日國慶節前，向全世界示吓威。更有人話，佢其實係沽咗期指、買咗黃金，所以夾硬做低個市。點都好啦，只要佢一日唔收埋支炮，一日都會挑動到特朗普神經。試諗吓，以北韓目前技術，假如有一支原定飛越日本領空的導彈，不慎墜落日本境內，仲唔世界大戰？所以話，真打就唔會喇，但擦槍走火就真係話唔埋！
恒指已經連續兩日失守了八月初的最高收市位27,854點，算是突破失敗。技術上，八月的兩個高點出現了RSI的頂背馳，情況同二、三月份的雙頂差唔多。當時市場亦同樣炒作緊美國同北韓之間的緊張關係，結果，恒指自三月中到四月中下跌了800至1,000點，是陰乾式的下跌而不是股災。我預計今次的結果都係一樣，恒指往下的目標先睇27,000點的頸線，一旦失守，跌浪的幅度就會加大，速度亦會加快。
大市疲弱，有兩個主題的股份依然好炒：一個係深港通新貴，另一係蘋果公司概念股。深港通方面，從丘鈦科技（01478）到中國奧園（03883），再到宇華教育（06169）我都有斬獲。至於蘋概，又畀我捉到隻高偉電子（01415），真係幾部iPhone都返晒嚟呀！而騰訊（00700）業績後中了「330.2」的咒，半個月了，都封到實一實。有cash喺手的粉絲就即管揸多陣，無蟻咬的！
富昌金融研究部總監 譚朗蔚（作者為註冊持牌人士，持有騰訊、丘鈦及奧園）