Market Insight：教育板塊全面炒起

屆時股王一旦向下，市場持貨信心將備受考驗。故若現時手頭並未有太多貨者，宜持觀望態度，不要心急買貨，寧願等爆邊追，都咪做錯邊。

誠如古勝周二提及，呢幾日指數同重磅股都表現呆滯，但二、三線股就有番啲炒味，如新興的教育板塊。

隨着內地推動城鎮化，生活水平不斷提高，加上推行二孩政策，教育行業發展迅速，民辦學校如雨後春筍。可是，由於民辦教育企業受制於各種政策因素，申請A股IPO受阻，故紛紛轉戰香港股市。

現時板塊內有新高教集團（02001）、民生教育（01569）、宇華教育（06169）、睿見教育（06068）、楓葉教育（01317）等，前四者今年上半年才上市，半新股勝在冇包袱，在炒股不炒市下更易吸引游資炒作。

規管ICO 早出手好過遲

內地七大部委聯手規管ICO（首次代幣發行），香港監管部門隨即有和應，兩地的走資相關活動勢受影響。聽聞內地有逾十萬人在瘋炒ICO，時值領導人三番四次強調要防範金融風險，ICO便成為規管者的針對對象。

完善虛擬貨幣發展

事實上，同胞們投資向來習慣一窩蜂，ICO失控，確實可視為金融安全隱患，早出手好過遲出手！

古勝覺得，虛擬貨幣咁樣發展落去，遲早會有一次來個通殺，即係虛擬貨幣泡沫爆破之餘，亦會拖冧金融市場，但即使如此，並唔等於虛擬貨幣會從此玩完，相反會在教訓中繼續發展、完善、成長。

情況就如二○○○年科網股熱潮一樣，人人發瘋以EBITDA論科網股估值，結果泡沫爆破，換來股災劫難。可十數年後的今日，港股股王不再是國際金融股，而是內地科網巨企！

晶片股似異軍突起

蘋果概念股終於見回吐，呢幾日最熱炒的高偉電子（01415），昨日股價上過5.78元，又回過落4.8元，收報5.17元，升0.19%。瘋狂派對尾段通常係最難玩，若自知技不如人，就惟有做旁觀者。

中芯有望重上50日線

反而，在下見到晶片股有異軍突起之勢，其中中芯國際（00981）由開市價7.23元抽到上高位見8.12元，收報8.11元，升12%，成交達7.97億元，真係好耐未見過中芯咁醒神。

睇番幅圖表走勢，其股價由年頭12元水平，碌到落上周初低位見6.91元，真係吊頸都要抖抖氣，睇吓呢浪企唔企得穩喺50日線8.2元樓上。此外，ASM太平洋（00522）亦見異動，以全日高位105.3元收市，升8.56%，重新登上紅底股之列。睇見成交都唔細，似乎都仲有得炒吓，但跟炒只宜小注，且必須要訂好止蝕位，盡量炒即日鮮為妙。

古勝