絲絲講場：小米瞓身印度Show新機
小米近年遭中外對手夾擊，內地銷售陷入低潮，迫使佢哋要狂攻印度市場圖東山再起。小米尋日更將全球產品發布會移師印度舉行，隆重宣布推出雙鏡頭新機小米A1，絲絲有幸喺印度現場見到世界各地傳媒、連同超過250名「米粉」撐場。難得嘅係，每當小米國際產品市場部總監宋嘉寧（Donovan）講到新機的特徵，都會引來全場歡呼。
當地線上銷量No.1
有數據話今年第二季小米喺印度嘅手機出貨量480萬部，僅次另一家手機巨頭三星，領先vivo、OPPO及Lenovo，當中95%嘅小米手機都喺印度生產。小米喺印度繼續沿用線上促銷手法，截至今年第二季，線上銷量排第一，佔46.8%；旗下紅米4及紅米Note 4亦是銷量最高。
Donovan話無定小米A1目標銷售量，但佢深信小米A1會非常暢銷，同時會盡量確保產品有足夠供應量。
佢又講，今次谷歌與小米軟硬件戰略合作生產小米A1，採用Android One系統，而唔係MIUI，屬於小米一個突破。
小米A1將會喺全球40多個市場銷售，包括香港、印度、台灣等等，而新機將於九月七日起在港開售。
余絲韻