Market Insight：炒iPhone概念見好要收

九月十二日蘋果公司就會公布萬眾期待的iPhone 8銷售詳情，由於係iPhone十周年版，大家都對新品的功能有一番期望。

通達集團小注一試

此前，蘋果公司概念股成游資樂園，好似隻高偉電子（01415），上周五經已大炒咗一轉，估唔到昨日又再度炒上，收報5.16元，升21.7%，成交10億元，公司市值才42.9億元，真係炒到出晒煙！純炒作，當然係有智慧不如趁勢，但憧憬好快變會事實，要提防好消息出貨，尤其係技術指標已嚴重超買，謹記有胡要食。

同樣炒手機零件概念的通達集團（00698）亦有好表現，高位搶到上2.47元，收報2.41元，升11.57%，成交有7.8億元。通達上月公布的中期業績符合預期，公司將維持派息比率在30至35%。自五月大股東配股股價下跌以來，未見復勇，昨日出咗支大陽燭算係醒神番。

技術上，該股10日線已重上20日線，短線或可乘勢上試七月高位2.67元，回吐宜守昨日平均成交價2.35元，可小注一試。

叫停ICO打擊虛擬貨幣

上周六傳來中國人民銀行叫停代幣發行融資（ICO，Initial Coin Offering），消息抵銷了避險資金流入的影響，見到比特幣價格受壓，執筆時價格約4,449美元，高位計回落一成有多。另一方面，就見到人民幣創逾十五個半月新高。由於比特幣價格大幅波動的場面屢見不鮮，所以市場都似乎視作等閒。

回說ICO，內地最近真係瘋炒呢個玩意，大致上係籌資者可以透過區塊鏈技術，發行初始代幣的方式獲得融資，而這些初始代幣，必須要用比特幣等虛擬貨幣購買，這使得兩者價格產生連動性，亦大大增加比特幣的需求。如今上大人一刀切禁ICO，到底會對虛擬貨幣影響有多大？仍須觀察。

不過，古勝始終相信，圍繞虛擬貨幣的更多是涉及傳銷的活動，最終參與的大部分人都要損手離場，結果比炒作細價股更加慘烈不知多少倍。

故此，若自問對呢瓣新鮮事物認識唔多的，唔好耳仔軟聽人講可以賺快錢賺大錢就亂咁投資，唔好淨係識得問可以贏幾多錢，都要問吓自己輸唔輸得起，等到渣都冇得剩先至嚟後悔，已於事無補。

二線股有鑊氣係好事

唔知各位股友有冇留意，近排恒指上到28,000點關口，大價股抖氣，反而二、三線股就有番啲生氣。呢個現象唔係差，即係話啲錢仲留喺個魚缸度，亦顯得今次升市表現較為全面。昨日古勝提及的手遊股，真係有番啲氣氛，其中博雅互動（00434）及雲遊控股（00484）同升14%，網龍（00777）再升1.7%，有貨不妨安坐順風車。

反觀股王騰訊（00700），受所佔恒指比例下降影響已暫告一段落，惟昨日低開低走，股價一度低見321.4元，收報322元，跌1.29%，再次失守10日及20日平均線，但成交不多，反映沽壓並非想像中大。暫時還是以靜制動，冇平貨喺手，仲係咪心急撈貨。

古勝