絲絲講場：瞓身創業 又想有自己生活？

1. 加插得意嘢落悶兜嘢度

冷氣房開會傾電話當然舒服，但全神貫注坐足成粒鐘未必咁易。健身班平台FitReserve嘅Megan Smyth就選擇每日安排啲電話會議，畀自己一路行一路講，冇咁悶之餘，仲可以保持頭腦清醒。

2. 學樣完全唔識嘅新嘢

寵物狗玩具商Bark/Barkbox嘅Carly Strife話，雖然自己讀機械工程出身，但從未砌成一件嘢，最近搵咗部電單車返嚟研究，又話一間公司同部電單車好似，由不同組件砌成，運轉起上嚟就好靚，希望運用經營公司嘅道理喺整車度。

3. 搵最花時間嘅嘢去做

放狗平台Barkly Pets嘅David Comiskey搵啲因為工作忙而丟低咗嘅嗜好，前提要夠花時間，佢選擇整湯糰（Gnocchi），淨係焗薯仔已經要用個半鐘，咁先畀到自己多啲時間抽離工作以外，否則長時間工作只會愈嚟愈做唔到想做嘅嘢。

4. 用冥想幫自己叉電

為咗保持頭腦清晰，男士服飾網站Mizzen+Main創辦人Kevin Lavelle就選擇冥想，等自己成個人重新開機、叉電，仲話自己本來唔信，試過先知冥想力量有幾勁！

5. 挑戰極限行山路徑

有機餐配送服務商Green Chef嘅Michael Joseph就選擇挑戰極限嘅行山路徑，登頂後可以將山下景觀盡收眼底，更得到令自己興奮嘅內分泌物安多酚（Endorphins），有錢都買唔到，而且行山需時耐，節奏較慢，畀到自己更多空間思考問題。

6. 嘗試克服最大恐懼

健康保險平台HealthSherpa嘅Cat Perez選擇透過室內攀石克服畏高，因為攀石需要全神貫注，仲話增強咗同老公之間嘅信任。

余絲韻