孖妹S檔案：睇實資金流8指標 部署快夾準

1：睇EPFR數據知熱錢點走

仁：散戶 阿仁

劉：獨立股評人 劉慧詩

黎：時富金融優越投資部顧問 黎永良

Kitty：資金流向監測機構EPFR Global一向都為金融機構提供基金流向同埋資產分配數據，數據係直接嚟自基金公司等，所以啲數字都好有代表性，值得參考，雖然係客戶先睇到數據，不過若然係金融機構或者媒體引述呢啲數據，可以睇多幾眼。

彩兒：近幾個禮拜，流入新興市場嘅資金開始放慢，根據EPFR Global數據就睇到，喺近21個星期，新興市場已累計流入近400億美元（3,120億港元）。

散戶阿仁稱，平時會留意港匯情況。	獨立股評人劉慧詩表示，有部分網站提供散戶及大戶買盤比率。	時富黎永良稱，資金流指標是一個動能指標，與RSI相似。

2：公司回購對前景有啟示

Kitty：上市公司回購，即係公司出錢，喺二級市場買番公司股份，呢個情況通常係因為公司有剩餘資金或者股價跌至低殘時出現，皆因回購會增加市場購買力，所以大陣仗嘅回購普遍有力托高股價，間接令股東受惠。例如滙豐控股（00005）就密密喺二級市場掃貨。

彩兒：有時啲股友都鍾意睇住有冇大股東或者管理層增持，皆因高管梗係比出面嘅人了解公司內部運作啦，佢哋都增持睇好，多數都有好路數。

3：望沽空比率 判大市走勢

彩兒：目前有超過800隻股票可以沽空，沽空比率係沽空金額佔股份成交額嘅比重。除咗股份沽空比率，仲有大市嘅沽空比率，普遍嚟講，沽空比率愈高，代表沽空活動愈活躍，反映投資者對後市睇法偏淡。

Kitty：我記得睇過研究報告話，如果大市沽空比率係超過8%，之後20日恒指升嘅概率反而係高咗。

4：窩輪資金流 助估值博率

Kitty：成日都話大戶挾倉，即係話大戶大石砸死蟹，睇準牛熊證街貨分布等衍生產品嘅資金流，以大量買盤或沽盤，扭轉股價/股市升勢或跌勢，所以睇住輪證資金流係好重要。

彩兒：最近我就鍾意喺瑞銀香港認股證網站睇資料，主頁已睇到恒指牛熊證街貨分布、重貨區喺乜水位，另外，佢嘅市場統計資料入面嘅資金流圖表夠晒一目了然，以建設銀行（00939）為例，截至八月三十一日嘅單日數據（網站數據僅更新至前一個交易日），相關認購證淨流入有約179萬元，相關認沽證資金淨流出105萬元，粗略睇，咁可以反映資金見到當日正股股價下跌，想博反彈，或者傾向睇好建行未來表現。

留意街貨量成交量

劉：不過，我覺得輪證資金流似乎同正股關連度唔算太高，有時正股勁升，相關輪證價值都跟唔足……我反而覺得要留意街貨量、成交量，唔好揀街貨咁重嘅，因好多時都係大戶派晒貨，缺乏秩序，想佢緊貼正股走就難上加難。

5：港股通數據 探北水口味

彩兒：北水威力幾咁勇猛唔使我多講，逐個板塊輪流炒，想跟住北水節奏，知道北水流入定流出，追揸沽啲乜，不妨睇實幾個網站，《東網Money18》嘅滬港通/深港通專區，入面表列滬深兩地港股通每日餘額，資金流出流入情況，仲表列整月數據畀你慢慢鑽研！

持倉比率幫手揀股

Kitty：我就留意到摩通同埋瑞信網站，都有得睇港股通十大成交股份數據，後者嘅AH互聯互通專區可以睇到資金流入流出情況之餘，仲清楚睇到趨勢，亦有埋北水持倉比例，雖然部分數據喺披露易都睇到，但始終都係有圖表、色彩繽紛啲冇咁悶吖嘛。舉例講，截至八月底止，北水（港股通資金）持倉佔比最高嘅係德普科技（03823），佔已發行股份逾34%。

劉：雖然我比較多用收費投資軟件，但港股通資金流同埋持倉比率喺好多網站都可以睇到，可以睇到北水追邊啲板塊，同香港股友口味有乜嘢分別，都對我嘅分析同選股靈感有幫助。

6：港匯強弱 反映資金進出

Kitty：外資係咪吼住港股，其實瞞唔過醒目仔嘅法眼，「法眼」唔難練，睇住港元資金流都可以睇到蛛絲馬迹，外資想買港股，就會出現資金流入壓力，皆因佢哋要將外幣兌做港紙先，令港元需求增加，資金流入會搞到港元價量齊升，港元匯率強勢、香港銀行淨港元負債或者係金管局嘅淨港元負債（即係成日講嘅貨幣基礎）就會增加；資金流出就會有相反嘅情況。

近弱方保證即走資

彩兒：Hey，成日聽到話港元觸及強方兌換保證匯率嘅，即每美元兌7.75港元水平，若有咁嘅情況，好多時係代表熱錢湧入。

仁：我都會睇實港匯情況，若港匯挨近7.85弱方兌換保證，即資金流出香港市場；挨近強方兌換保證，就代表資金係咁流入香港。皆因有好多基金都係用美元做結算，如果佢哋要將美元兌番做港元炒港股，就會推動港匯喇。我會留意流入香港嘅錢喺邊度嚟嘅，若內地資金，就會搵中資股，或者係喺香港上市嘅內地公司嚟買喇。

7：去披露易了解大戶手影

彩兒：想知大戶掃乜貨、錢銀泊去邊，當然可以喺港交所披露易嘅披露權益睇到啦，《證券及期貨條例》要求大股東，即係持有上市公司5%或以上股份權益嘅人，同埋上市公司董事及最高行政人員，一定要披露佢對公司嘅權益或淡倉。事實上，有啲股友鍾意跟住「名牌效應」入市，例如大摩、鄧普頓買乜股份，芬佬口味都會成為佢哋指標。

Kitty：不過，披露權益係有時間滯後嘅問題，就算係大股東或者大行增持或減持，股友都要兩、三日後先收到風，到時股份或者都已經飆升或急插咗，未必可以把握最佳入市良機，捕唔捕捉到就要睇吓運氣喇。

劉：有部分網站更可以睇到散戶同大戶買盤嘅比率添，若見到大戶退場，散戶追入，就意味股價上升動力會減弱。

8：資金流指標 睇超買超賣

黎：資金流指標（Money Flow Index）係一個動能指標，佢其實同RSI（相對強弱指標）相似，如果數字上升，就代表買方力度，下跌就代表賣方力度，MFI值通常係0至100之間，坊間鍾意用14日做比較，視80及以上水平為超買，20樓下係超賣，但我覺得好容易跌落走勢陷阱，我比較鍾意「偷步」，哈哈，用10日做比較，視70及以上為超買，20樓下係超賣，咁就可以快人一步。不過，呢樣都只可作參考，仲要睇其他8至10樣指標先會做嘢，因為依家愈來愈多Algo Trading（演算交易）同埋AI Trading（人工智能交易），佢哋會創出好多陷阱畀你踩。

彩兒：若股價創新高，MFI冇跟住創新高，就即係轉弱信號，即將下跌；若股價創新低，MFI冇跟，即係轉強，股價將會上升……

Kitty：我好多姊妹都係數字絕緣體，想教識佢哋應該要啲時間。

彩兒、Kitty

若有料報畀彩兒同Kitty或有嘢問，可電郵money.biz@on.cc