期指結算日，真係乜事都可能發生。本周初大市技術走勢麻麻，即市動力減弱，以為會有一個相對沉悶的結算，誰不知好友揀昨日一舉撲殺淡友。
恒指開高192點，以27,957點開出後，還未補回裂口，稍試27,912點即市低位後，由頭升到尾，恒指重返兩萬八水平，破埋上個高位28,070點，見28,127點改寫今浪高位，最終升329點報28,094點，主板成交增至1,059億元，國指升78點報11,374點。
喺幾隻重磅內銀公布業績前，資金的取向明顯流於審慎，形成國指表現遜於恒指，未有突破周初高位11,461點，國指後市走勢繫於內銀股表現。
過去兩日，到底大戶存心「裝彈弓」抑或短期調整已完成？暫仍難下判斷。基於遲來的結算日逆轉，筆者建議候低再買，昨日見咁形勢，只能自嘆走寶。今日基金月結，期指大戶完成轉倉，相信市況較為反覆，錯過機會惟有再等，都係嗰句：「升市莫估頂」，候低買勝過不斷試沽坐艇。
John Mullen