Market Insight：中港股市風險漸增

港股昨日嚟個後抽，重上28,000點樓上，創下逾兩年新高28,127點，收報28,094點，升329點，主板成交1,059億元。期指結算完先嚟破頂，到底係咩玩法，唔通九月真係有大派對跟尾？

騰訊控股（00700）為昨日升市動力來源，全日高位327.6元，收報326.6元，升2.13%，帶動恒指上升點數64點，就係略嫌成交不算太多，為57.3億元。

近日人民幣強勢，係最近A股回勇及中資股反覆向上的原因之一。之不過，古勝認為，以下半年內地經濟的發展狀況來看，不見得可支持人民幣繼續走強。

人民幣過強成隱憂

雖然走勢上，在下相信暫時兩地股市未有大跌之虞，但就總覺得人仔的強勢不可持續，只是十一月的維穩市扭曲了市況，實在難以用基本因素解釋。這亦說明未來兩個月股市風險會漸增，看官謹記要知所進退，別每次升浪都只懂坐到最後先識起身，白白見財化水。

中銀有買貴無買錯

收市後打頭陣出中期業績的內銀股，工商銀行（01398）半年多賺1.8%，而農行（01288）則多賺3.3%，同市場估計差不多，不良貸款比重及淨利息收益率微跌，都在預期之內。

透明度極高的內銀，無驚喜就係最大驚喜，相信恒指要站在兩萬八基礎上再往上走，騰訊之外，若無咗內地基金至愛的內銀股一定唔成事。

中銀香港（02388）亦公布中績，半年賺172.1億元，當中包括持續經營業務盈利146.27億元，按年升24.5%，以及出售集友所得的終止經營業務溢利25.89億元，每股賺1.6283元，中期息0.545元外再加特別股息0.095元。

以中銀的14.1倍市盈率，3.7厘股息，本地銀行中依然是較吸引之選，40元樓下有買貴無買錯。

手機股升勢似近尾聲

科網股再回勇，騰訊現時20日線已失而復得，且看短線可否站穩10日線325元樓上，照計企得穩的話，後市仍有機會挑戰高位；但若受阻回落甚至再失20日線，大概可以確認見了短期頂部，調整將持續，咁就要把握落車機會了。

果粉們引頸以待的新一代iPhone 8，到執筆時都仲未確認缸邊傳聞的九月十二日發布會堅定流。不過，從蘋果公司季績對第四季極為樂觀的盈利指引，十周年版本iPhone面世點都已進入倒數階段。

丘鈦科技倒跌有啟示

國際研究諮詢機構IDC預測，明年iPhone出貨量會上升9.1%，刺激周二晚蘋果公司股價創出162.91美元的歷史新高。飲蘋果公司奶水大的瑞聲科技（02018）及舜宇光學（02382），消息配合繼續爆上，昨升1.2%及0.7%。

都係嗰句，股市永遠buy on rumor, sell on fact，自問身手唔夠敏捷，咪妄想博最後一浸利錢。昨日隻丘鈦科技（01478）破完頂倒跌，似乎為手機設備股炒到尾聲揭開序幕。

古勝