絲絲講場：Uber救世主曾經係難民
召車應用程式Uber公布，旅遊預訂網站Expedia行政總裁霍斯勞沙希（Dara Khosrowshahi）將過檔掌舵，接下Uber前舵手卡蘭尼克六月請辭後遺下嘅爛攤子。霍氏點樣由伊朗難民，變成美國新移民，再成為今日拯救Uber嘅「救世主」？
Expedia開國功臣執爛攤子
霍氏生於伊朗德克蘭，家族經營生意，但9歲喺伊朗革命前夕成家逃亡到美國，生意亦被伊朗新政權吞咗。阿爸喺伊朗被扣留咗六年，得番媽媽一個喺美國照顧三個細路。
霍氏喺布朗大學讀機械工程，之後再轉到紐約修讀財務。佢後來得傳媒大亨迪勒（Barry Diller）賞識而被招攬加入其公司，○五年迪勒分拆旗下旅遊業務Expedia無耐，就由霍氏當上主帥。
可以想像，霍氏上任後就需着手處理Uber重重問題，包括性騷擾指控、多個高層離職、官司糾紛，以至與監管機構角力等等。
霍氏似乎「無有怕」，形容呢次係「難得嘅機會」，又話因為充滿挑戰，先顯得有趣。救唔救到Uber？拭目以待。
余絲韻