絲絲講場：港交所停市數據中心照RUN

「天鴿」撲過來，港股休市，喺香港交易所（00388）做有得休息？No啦。打風地震個天冧落嚟又如何，佢哋資訊科技科有啲同事都要喺港交所數據中心緊守崗位，邊確保呢個交易平台嘅「心臟」正常運作，仲要邊為「搵食」張羅！

喺將軍澳嘅港交所數據中心保安超嚴密，要用指定卡加埋指定指紋先入得，有啲放置設備嘅地方，仲一定要除鞋至入到。嗰度一年365日、每日24小時都有操作人員嚴密監察，絕對係全年無休。

其實數據中心都有休息中心，聽講有按摩椅、健身室、電視咁。仲有個員工餐廳，餐廳啲枱下面裝晒電線設備，隨時準備港交所中環大本營有乜「依郁」，可立即撤退，餐廳即變臨時Office！

不過喺打風日子，員工餐廳唔開，方圓百里又無食肆，呢班緊守數據中心嘅同事點算？

就靠新一輪值班嘅同事喺外面買夠嘢食帶返中心，供應團隊所需。數據中心入面亦設有自動售賣機，供應飲料與即食麵咁，唔會餓親。港交所仲會為值班同事提供膳食津貼。

有賴佢哋，港交所交易系統過往十年都達到100%嘅運作率！

絲絲謹向惡劣天氣及環境下仍緊守崗位嘅各位致意！

余絲韻