Market Insight：醫藥板塊落後有因

與其被牽住走，倒不如將焦點放番喺自己個組合，減減槓桿迴避吓風險。要有心理準備，嚟緊個市真係跌的話，唔會係一兩日貨仔，等跌浪確認再追沽都未遲。

今年以來，港股升浪中相對落後的醫藥板塊，在升市尾段開始見到個別藉業績消息炒上。四環醫藥（00460）中期純利按年升14%，中期息增加，股價昨急彈8.3%至3.12收市。不過，四環股價周一急挫至2.88元，昨日回升亦只不過視為反彈，短線向上3.2至3.3元水平阻力甚大，遇阻回落的話，論走勢仍然偏弱，提防股價反彈過後要繼續尋底。

康哲高追欠值博率

要短炒，當然係揀強唔揀弱。觀乎康哲藥業（00867）中績純利增長23%，每股派息增加，股價昨創52周新高15.52元，收報14.7元，升11%，睇勢應該仲有得去。事實上，近兩財年康哲業績穩定增長，業績跑贏同業。不過，論估值，除非下半年業績有好大驚喜，否則股價在16元樓上已屆合理水平，高追值博率唔太吸引。反正板塊氣氛未成氣候，股份個別發展，還是候調整再作考慮。

食品股經營未見改善

騰訊控股（00700）昨日逆市低收，收報324元，跌0.61%。短線而言，只要守得住318元樓上，仍可以短線調整看待，但若失守此位，則今次調整可能需時較長，或須回試300元或樓下承接再覓方向。長坐贏得深的，又有能力打持久戰，照坐無妨；若本錢唔多，想沾手相關輪證刀仔鋸大樹，忍到手盡量忍一忍。

業績股繼續為焦點。中國旺旺（00151）上半年純利跌14%，毛利率跌3.3個百分點至44.5%，大致喺市場預期內；康師傅（00322）中期純利升54%，毛利率降2.53個百分點至29.1%；統一企業（00220）中期純利跌26%，毛利率降3.3個百分點至33.6%。行業三大巨頭毛利率均受壓，次季的經營亦未見有好大改善，是近日板塊氣氛利淡的主要原因。

古勝喺六月底曾推介過食品股，業績前果然有一轉炒，夠晒水位落車。可惜的是最近公布的業績還是未盡人意，股價見光死亦係無可避免。鑑於行業景氣未見大起色，資金持續流出，見旺旺及康師傅的沽空轉活躍。大局如此，還是別心思思想翻兜，等季內股價下試大位支持再作部署。

中建築供股權有得諗

中國建築（03311）中期純利增長一成至24.9億元，派發中期息每股15仙，表現不過不失，但出其不意的是，公司同時宣布進行八供一，集資淨額約63億元，包銷商為控股股東中國海外集團。

事實上，從中期業績可見，中國建築在公私營合作（PPP）項目數量增加之下，現金流顯著減少，中期經營現金流出為20億元，去年同期錄得經營現金流入20億元，要打股東荷包主意，又唔係冇迹可尋。

受供股消息影響，中國建築股價昨日一度低見11.36元，收報11.6元，跌7.2%，成交達5.69億元。以中國海外（00688）及其附屬現時於中國建築的持股量約62%看，小股東唔供，作為包銷商的大股東可乘機增持。到底供定唔供，就要睇小股東點睇公司的PPP項目發展前景。在下認為，板塊中也許有更穩健的選擇，反而有興趣此次供股，供股權可供買賣，到時留意吓股價表現，睇吓個供股權有冇得炒番轉！

古勝