絲絲講場：信貸評分高 脫「獨」話咁易
以為個人信貸評分（Credit Score）淨係會影響借錢利率？又或者左右你嘅搵工大計？唔止！研究話，信貸評分高，會令你魅力提升，容易吸引潛在對象，即脫「獨」機會可能都高啲！
有財務責任感至吸引
外電引述約會服務公司一項調查指出，2,000名受訪者中，絕大多數認為個人信貸評分高嘅人具有吸引力，「財務責任」（69%）於芸芸「擇偶條件」中排列超前，揮低晒「風趣」（67%）、「樣靚」（51%）、「有上進心」（50%）等其他條件。點解？因為大家覺得信貸評分愈高，代表個人有責任感、值得信賴，同埋夠醒！
唔少約會程式用家都會用心經營自己張靚相，好似上載張名車相或者索爆做Gym相咁。嗱，捉錯用神喇，畀張高信貸評分相分分鐘仲有吸引力！調查顯示，58%受訪者認為「財務責任」比有部靚車更正斗，50%認為比掛個超勁嘅職銜更緊要，甚至有40%認為比超索身材超正身形更吸引！
講到咁，大家似乎都要關心吓經營吓自己個信貸評分，不過是否就咁就脫到「獨」就唔知喇！
余絲韻