絲絲講場：成吉思汗 武則天 疊水過科網富豪！
魔鏡魔鏡，呢個世界上，最有錢係邊個？微軟創辦人蓋茨，還是亞馬遜創辦人貝索斯？等陣，如果穿越時空，比較埋古今，排名不分先後，最有錢嘅係以下幾位，睇吓你又噏得出幾多個？
1 成吉思汗（1162-1227年）
即係元太祖，佢建立橫跨歐亞嘅蒙古帝國，版圖包括今日嘅中國、韓國、俄羅斯等，以佢佔據咗全球22%土地計，資產規模至少1萬億美元，仲未計土地上嘅生產總值，係真正嘅「土地霸權」。
可惜佢有錢都冇乜點享受，一味顧住打仗，宮殿都冇起間畀自己，大部分財富留晒畀屬下與後人。
2 宋神宗（1048-1085年）
即係北宋第六代皇帝。宋朝憑住科技、商品經濟及文化教育嘅發展，成為後世公認最有錢嘅朝代。宋神宗多得大臣王安石搞變法，財富再增加，當時佔全球GDP（生產總值）25至30%。
至於幫老闆賺錢嘅王安石，自己唔理儀容又喜口出狂言，仲聽講日日食同一道菜，只望食完快開工，夠晒搏。可惜，變法因用人不善，促成黨爭，加速北宋亡國。Anyway，佢老闆宋神宗點都多得佢唔少。
3 武則天（624-705年）
佢係中國歷史上第一位、亦係唯一一位正統嘅女皇帝，將唐朝的領土擴張至中亞地區，真正做到佢所講嘅「只要大權在握，朕即天下」，佢係有史以來最有錢嘅女人，資產規模佔當時全球GDP嘅22.7%，有錢過埃及妖后Cleopatra同俄國女皇凱撒琳大帝。
4 所羅門王（公元前970-930年）
佢係以色列王國第三任君主，聽講係象徵智慧與財富，資產多來自商業、貿易及朝貢。佢擁有大量寶藏，單計黃金就有25噸，估計財富達2.2萬億美元。
除此以外，絲絲仲想講吓羅馬帝國開國君主奧古斯都、印度阿克巴大帝……Oops，冇位寫添！
余絲韻