孖妹S檔案：初哥落魚缸先學3招傍身

鄭：華富嘉洛證券資產管理副總裁　鄭昆侖

胡：資深投資者兼投資書作家　胡李察

第一步入門：佣金計法要一清二楚

彩兒：正所謂「工欲善其事，必先利其器」，開設稱心投資戶口最實際，有唔少股友開落「N個」股票戶口拎着數，最後仍然貪方便，用開嗰個戶口就繼續用。計我話，戶口唔使多，最緊要啱自己用，小數怕長計，若然係Trade得密嘅快閃黨，佣金最緊要一個字──「平」！其實好多證券行都以平佣，甚至係免佣作招徠，例如，8 Securities同一通證券都係零佣，不過就會收其他交易費，最過癮係有券商採用AI投資顧問，仲有網上客服即時答你戶口操作上嘅問題添。

部分證券行交易收費	資深投資者胡李察建議投資初哥選股勿一味貪平。	華富嘉洛鄭昆侖稱，欠經驗的新手若想入市，最緊要懂分散投資。（黃偉邦攝）

Kitty：魔鬼在細節啊！一通每次交易收費係0.005%，最低5元，但佢不設合單，假設買入10手股票，一單刁有可能要分10次成交，最終交易費都唔係極平；8 Securities派息時就會收0.5%（最低28元）嘅股息費用，喺行內算係比較高。

揀上市券商有保證

胡：平又未必好，以我多年經驗，我傾向揀有上市嘅證券行，又或者係銀行，因為較為穩陣，同埋部分證券行會用全日合共交易金額去計佣金，銀行會同你逐單交易計錢，計及最低收費，若然係交易得密、而多數短炒嘅股友，銀行收費就會比較乸脷。不過，根據「投資者賠償基金」，一旦中介人違責，每位投資者喺證券及期貨合約獲賠上限係15萬元，所以都唔使太擔心有咩事會渣都冇嘅。我個人鍾意用電話Apps落盤，一嚟交易費平啲，二嚟唔會好似電話落盤咁打唔通，或者畀隔籬嘅人偷聽到。

第二步揀股：分散投資 吼盈富中移

Kitty：我有啲小鮮肉朋友想入場炒股，儲吓老婆本，你有咁豐富嘅資產管理經驗，幫手指點迷津啦。

鄭：見大市好景，冇經驗嘅新手想試吓入市賺番筆，人之常情，但我覺得佢哋最緊要係分散投資，唔好玩All-in。我假設佢有20萬元本金，最好分開四塊餅，四分之一放落盈富基金（02800），以交易所買賣基金（ETF）追貼大市表現，操作簡單，風險相對買入個股低，顧及近幾個月大市波動性高，一般散戶容易被震走，佢就幫到手分散風險，但大市風險就走唔甩。另外四分之一就可以放喺有4厘息以上嘅收息股、公用股或電訊股，例如中國移動（00941）及電能實業（00006），喺大市調整或者經濟周期轉勢時，可起穩定組合作用，同盈富一攻一守。

鄭：貼心啲諗，呢類股友一定係因應某啲股份，例如係科技股升勢靚仔先心動想入市嘅，佢哋嘅升勢大部分係受市場氣氛同資金推動。舉例講，騰訊控股（00700）出完半年業績後，一七年市盈率跌到去40幾倍，好難判斷平貴，所以不妨放四分之一資金落去投機；佢哋亦有機會聽到非當炒股份嘅入市貼士而好想買，我建議佢哋睇多幾個人意見、自己分析公司業務，最好揀貼近生活嘅產業嚟買，利用餘下資金試自己眼光。

彩兒：你嘅股齡大過我年齡一截，喺股海真係食鹽多過我食米！

選升息兼備 勿貪平

胡：我八七年開始炒股，一炒就遇着環球股災，當年我主要買藍籌股，買大升市入面未升嗰啲，但最衰就係嗰類股，升就冇佢份，跌時又跌得多過人，好在當年蝕得唔多咋！之後我就緊守「寧買當頭起、勿買當頭跌」嘅格言，主要玩創52周新高嘅股份，皆因股票市場係好講供求，呢類股份資金流入多於流出，自然升嘅機會較大，呢個方法我沿用至今都仲Work，年初至今炒股回報有五成。

胡：好多股友喺大升市入面會「畏高」，唔買風頭躉，寧願買「平」股，係一大謬誤，「平」嘢有可能代表業績唔掂，「平」唔一定係筍。仲有，切忌盲目買股收息，記住股份派息因素會反映喺股價度，派10厘息、若股價跌一成，就等於冇收過息！想長揸收息，一定要揀「升息兼備」嘅公司，賺息蝕價咪白做？

第三步策略：睇好騰訊可小注牛證

彩兒：係我眼中，你係個超高風險嘅投資者，有時我腦海會浮現你着住清兵衫，心口寫住個「勇」字嘅畫面，不過呢套衫，唔係個個着得起，哈哈哈！

胡：我嘅投資金句係「升市莫估頂，跌市莫估底」，同埋「高位大成交，出貨信號；低位大成交，入貨信號」，我係鍾意玩輪證，喺騰訊控股（00700）200至280元，我主力用佢嘅牛證炒波幅，每次注碼約200萬至300萬元不等，呢一轉累計賺幅50%。不過，大市去到28,000點見頂，我覺得會橫行一段時間，直到九月要睇定美國情況先再上路。睇好騰訊、依家想入市嘅新手股友，想刺激啲，不如揀250元以下打靶、唔貼價牛證，用十分之一資金試吓自己眼光，槓桿低都唔怕，起碼唔會瞓唔着嘛！

設止蝕位 保命法門

Kitty：守投資紀律，永遠都係達致持盈保泰嘅首步……

鄭：近年市況咁波動，設定止蝕位勁易被震走，例如係上年嘅脫歐公投咁，設10%止蝕嘅話，就等唔到佢反彈，不過對於冇經驗嘅初哥，要保住本金，設止蝕位都係高度建議佢做嘅；千祈唔好押注1至2項資產，追求平衡組合，亦係「保命」法門。

若有料報畀彩兒同Kitty或有嘢問，可電郵money.biz@on.cc

Kitty、彩兒