Market Insight：業績股繼續有睇頭

上周五白宮確認首席策略師班農離職，美股一度當壞消息出盡倒升，惟反彈曇花一現，道指埋單計跌76點，收報21,674點，走勢相當肉酸。狂人「侵侵」上任200幾日，政治成績表一片空白，經常跨過白宮新聞官亂咁發Twitter，好事變壞事，四處挑起火頭開始見眾叛親離的情況。

繼班農後，一直有傳白宮經濟顧問科恩亦可能劈炮，一旦成事，連鎖反應隨時有更多官員跳船，唔好話推行稅改變得遙不及可，「侵侵」政府施政都會愈來愈困難。

股市避險情緒高漲，金光閃閃，上周五金價一度衝上1,300美元樓上，創今年新高，十年期美債孳息落到2.16厘的個半月低位。睇外圍立立亂，今日港股可唔可以跟住上周五晚夜期反彈？只怕未必咁順利。

光伏股盈喜啱短炒

港匯持續偏軟，上周的資金報告顯示，截至上周三止的一周，新興市場股票基金錄得22周以來首次淨贖回，美股更連續九星期走資，而恒指有迹象在27,876點見了中期一個重要浪頂，因升市火車頭騰訊控股（00700）在優異的中期業績後，反高潮高開走低，大家實在不得不防。本周開始入市態度要審慎一點，控制注碼以減低風險，古勝睇今個星期大市落到50日線附近，試一試26,500點附近支持的機會唔細。

上周推介的金蝶國際（00268）終於發威，周五升4.8%報3.27元，成交對辦，短炒目標睇3.5元左右。今個星期估計市況風高浪急，入市揀番有消息支持的股份比較穩陣。上周協鑫新能源（00451）發盈喜，預告中期盈利翻兩番，由1.47億元人仔躍升至4.5億元人仔，股價勁升19.1%，收報0.435元。

之前同樣搞光伏生意的北控清潔能源（01250）亦發盈喜，估計多賺7至9倍，股價上周初曾經抽上0.22元，跟住在0.2元上下以旗形橫行，上周五成交額縮到得番三球幾，如果本周初交投再見突破，唔排除有第二棍爆上的可能。

三十幾度天氣，人山人海去睇新盤確係攞命，同時地產代理公布約睇樓都見放緩。不過，到底係受暑假的傳統淡季影響；擔心港元資金過剩情況有變，銀行水浸情況不再可能補加利息；抑或係內地大力阻截走資的措施見效；甚至樓市供應增加的長期效果開始浮現？似乎各種因素對樓市都有一定程度影響。

地產股吸引力未減

就算新盤減價促銷，在下相信對地產股的衝擊十分有限。一來○七年開始，地產股唔跟樓價走已成為常態，現時香港樓價站在歷史高峰，地產分類指數與○七年的40,024點仲有逾3,000點的距離，巨大的資產折讓，為樓市一旦下跌提供充裕的緩衝。

因時制宜，在股市完全反映唔到實際價值，就算沒有出售打算，近年個別老牌地產公司都開始願意積極透過重組業務，嘗試釋放潛藏價值。進取的投資者或會認為，博重組是守株待兔的悶蛋投資，但如果覺得股市已位高勢危，短期缺乏心水選擇，普遍交到近3厘息以上，好過收租的本地大型地產股，好似恒基地產（00012）及新鴻基地產（00016）等，不失為理想的資金停泊選擇。

古勝