絲絲講場：保險公司招新丁玩到盡
唔少保險公司嘅代理年紀都有番咁上下，所以近年好多險商都積極招攬年輕代理，香港永明金融就特登投資過百萬，打造一個「玩味」工作空間吸引新血！
永明工作間掟鏢打鞦韆
呢個「CHAT - Bright Gen Society」工作空間位於黃埔，總面積逾3,000平方呎，可以容納130名代理。香港永明金融分銷與市務總經理區張明儀（Belinda）表示，空間最大特色係設有各種玩樂設施，例如可以掟飛鏢、打吓機，仲有鞦韆櫈咁，畀後生代理工作期間鬆一鬆。
何止咁！Belinda話，公司仲為年輕代理提供「360度」支援，包括教佢哋打理個人Facebook或網站，亦會指導基本嘅服裝配搭、坐姿舉止等，幫助佢哋建立個人形象。
Belinda話公司仲會提供部分課程資助，幫助年輕代理自我增值，包括沖調咖啡、K-Pop以及龍舟課程等，等年輕代理對客嗰陣更容易「同聲同氣」。
香港永明金融目前約有2,000名代理，Belinda話期望到二○年時代理增至3,000名，並希望現時約40%為年輕代理嘅佔比，到二○年時可增至60%。
余絲韻