Market Insight：港交所追落後首選

績後在歐洲掛牌股價率先破頂，夜期勁挾，上周因為大市殺番落兩萬七樓下，定力不足對後市心存懷疑而清貨的股民，恐怕今日會悔不當初。

講開個市，自從恒指由27,876點高位，迅雷不及掩耳在短短三日殺成千點落嚟，再用四日時間都彈唔番上10日線上，成交仲愈玩愈縮，如果唔好彩被震走，眼見股王帶住大市再破頂，自己個倉卻是空空如也，大落後股之中，港交所（00388）真係諗得過。

唔少人認為，依家個市位高勢危，實情指數雖然企住一五年港股大時代之後的高位，可是成交額同當年旺時衝到上二千幾貼近三千億元，仲係有相當大距離。基金大戶資金集中在重磅股身上，二、三線股被投閒置散，完全未見大牛市的氣氛。

從種種迹象，抖完氣、試過底之後的港股，更上一層樓應唔難。今年升浪仍不及恒指的港交所，受惠於資金分流，市場熱度開始擴散，點計都有瞄頭。走勢上，昨收213.2元，距離八月初高位233.2元足足20蚊水位，有本錢的，呢個水位真係唔怕坐番多少貨底。

萬洲跑出有好戲睇

港股昨日喺股王騰訊出業績前，繼續低成交下向上，撲殺經歷上周的一跌，對後市半信半疑的魚缸騎牆派，恒指收市升234點收報27,409點，大市成交只有八字出頭。

昨日另一焦點是恒指公司於收市後的新一季揀蟀，結果一出，通街眼鏡碎，多人貼嗰幾隻統統落空，最終由「豬肉佬」萬洲國際（00288），代替成功私有化的鞋王百麗，填補藍籌名單中的空缺。

今次大家睇漏眼，一來萬洲上市時間唔算耐，早兩星期先啱啱夠三年，而且部分基礎股東陸續退場影響，一直未見鑊氣，作為一隻準藍籌交投活躍度稍遜。

其次，大家都知佢先前係雙匯A股，一三年到收購北美最大肉食加工公Smithfield，併合成為今日的萬洲，亦因此在過去三年，呢間香港上市的中資公司近六成收入來自北美洲舊有SMF的生意。姑勿論如何，估錯就要認，睇怕呢隻普遍基金無重貨在手的股票爆冷染藍，今日開出肯定挾到飛起。

憧憬愈大終失望愈大

所謂有人快樂有人愁，蘋果公司iPhone 8即將現真身，加上吹到九成九機會可以加入成分股，近幾個月強到無朋友的舜宇光學（02382），捧場客恐怕會後悔too late to leave the party，猛然醒起股市金科玉律，就是博最後一浸的利潤風險必定最大。

舜宇市盈率高不可攀

今年以來舜宇累升2.27倍，連今年升84%的股王騰訊都要行埋一邊，單係今個月，炒股價破位及憧憬染藍，舜宇由93元抽上111.8元，周二跌完一浸，昨日趁恒指服務公司消息前藉又嚟過，抽上110.2元收市。

現時舜宇歷史市盈率79.9倍，對比飲蘋果公司奶水大的瑞聲科技（02018）的29.9倍，拋離幾條街，即使盈利增長潛力較高，但到底溢價之中，幾多是預示染藍的可能性，炒家們心中有數。

話時話，萬洲一七年市盈率預測只係12.5倍，同恒指預測市盈率相去不遠，貼地的估值，相信亦係爆冷砌低貴到暈的舜宇能「入藍」的原因之一。

古勝