絲絲講場：索羅斯成鱷之路有段古？

但佢未做金融「大反派」、未變弱肉強食嘅大鱷前，過去原來有極黑暗一面，一九四四年嘅經歷改寫佢一生。

細個掩飾身份逃生

當年索羅斯13歲，納粹德軍佔領咗匈牙利，當地猶太居民委員會（Judenrat）既要執行納粹政策，又想保住猶太同胞，結果佢哋決定犧牲部分以保住大局，將部分猶太同胞列入「驅逐」名單。

佢哋當時專搵細路去派送「通知書」叫啲猶太人去報到，本身係猶太人嘅索羅斯亦係信差之一。佢將啲通知書帶返屋企，佢阿爸係律師，一睇即知唔對路，叫索羅斯派送時記得提醒對方，若報到就會被驅逐（歷史事實係，被「驅逐」者最終會被屠殺，Judenrat嘅角色成為歷史最大爭議之一）。

索羅斯阿爸當時仲即刻搵門路買假文件，自稱成家係基督徒。「如果唔係父親用假文件掩飾全家身份，我早就冇命！佢教曉咗我要面對殘酷現實，唔係合埋雙眼就冇事。一聞到危險，寧願一搏，生存機會點都高過乖乖跟大隊！」

訓練從黑暗面睇嘢

「就係咁，我訓練自己睇嘢由黑暗面去睇」，索羅斯仲話呢招喺金融市場好幫到佢，亦成為佢嘅政治方針。難怪佢有句投資金句：「要總結我嘅實用伎倆，得兩個字─『生存』。」

余絲韻