Market Insight：中糧系具短炒空間

買國企股要肯鬥長命

中資股方面，昨日見到好耐冇炒過的中糧系孖寶─中國食品（00506）及中國糧油控股（00606）股價異動，其中中國食品股價見52周新高4.29元，收報4.23元，升11.6%；中糧控股收報3.47元，升2.36%。還記得一五年A股大時代，中糧系炒作國企改革概念，中食上過6.5元水平，中糧亦升過上5元樓上。雖然兩者股價去年跌到得番2字頭，但以現價計，總算係肯坐就有望返家鄉，再次證明買國企股只要肯鬥長命，終有一天可以望到家鄉的說法管用。

再睇番隻中國食品，上周初股價急升，不過上周四、五港股急跌，該股亦連現兩支大陰燭，昨日可以大陽燭收復失地，更呈破頂，主要係受到系內重組海外業務消息刺激。反正在下唔係春江鴨，唔知佢嚟緊有咩搞作，但就相信系內重組一直進行中，不妨留意有何新消息。單純睇勢，偏強係事實，短線回吐守穩4元樓上的話，相信仍然有短炒空間。

染藍大熱不宜對着幹

業績股繼續為市場焦點，中國聯通（00762）發盈喜，股價飆半成，收報12.02元。睇番份公告，聯通上半年的成本控制得宜，亦見到收入增長逐步復甦。不過，老實講，論估值，12至13元已經到合理值，未來公司焦點都係落喺A股控股公司的混改進度上，預計此前股價主要波幅維持在11至13元水平內，有貨要識走位。

昨日收市後舜宇光學（02382）才公布業績，市場予以樂觀期待，再加上炒染藍概念及下月新iPhone登場，舜宇股價終於企喺100元關樓上收市，報103.8元，升7.5%，成交達12億元，市值已去到1,138億元。執筆時傳來舜宇業績，半年多賺約1.5倍至11.6億元人民幣，毛利率上升約3.9個百分點至20.6%，都算係勝預期。

由於股價升咗唔少，即使績後先升後回或即現回吐，亦不足奇，只係大家唔好諗住可以太低價買到貨，畢竟呢隻股染藍算係大熱，再加上其七月份手機鏡頭出貨量保持理想增長，撞啱嚟緊又係蘋果公司手機出貨量高峰，想做空都係搵其他選擇，無謂對着幹。

港交所係睇中長線

經已有超過三十年歷史的香港交易所（00388）交易大堂據講將會在今年十月底關閉，意味出市代表穿着「紅衫仔」坐喺交易大堂的場面相將會成為絕響。

時代變遷，證券交易無紙化，香港喺呢方面發展都算係行得比內地遲了，加上網上交易盛行，交易大堂完成歷史任務。

有番咁上下「股齡」的古勝，當然幾唔捨得，但唔捨得都要放下，畢竟時代進步，配套亦要提升才具效率，下下講保育，依家大家仲畫緊黑板！希望交易所將「紅衫仔」時代的事物好好記錄保存，以作為香港證券發展史的一部分。

講開港交所，早前股價炒業績上過230元樓上就見浪頂回落，昨日收報212.2元，已回落至承接區。睇番近月港股成交明顯增加，照計短期只係借地緣政治消息震倉居多，中長線可以繼續持有，唔使自亂陣腳。

古勝