絲絲講場：神沙車三年硬食3.5億！

金管局嘅「硬幣收集計劃」自一四年推出，唔經唔覺都成三年喇，兩部「神沙車」原來戰績幾彪炳，截至今年七月三十日，已服務全港十八區十五個循環，一共進行咗32.9萬宗交易，收集咗共2.78億枚神沙。

好難想像2.78億枚「神沙」究竟有幾多？簡單嚟講，即係總面值3.54億港元！不過如果你有興趣用「神沙車」，都要先睇睇規矩。金管局規定，每人每次回收上限約10公斤散銀，市民可將散銀換番做現金，或者增值八達通；如果你有愛心，仲可以直接投入車內嘅捐款箱。

企業跟風 創散銀兌換機

「神沙車」成日神出鬼沒，好難撞啱時間喎！大家唔使灰心，近年部分初創企業睇準「神沙商機」，研發咗自己嘅硬幣收集機，好似「Heycoins」散銀兌換機咁，「食」完散銀後可以畀市民增值電子支付工具，或換領多種商戶現金券。大家不妨善用唔同「神沙」工具！

余絲韻