絲絲講場：股市食瀉藥又賴丁蟹效應？

恒指過去兩日跌近千點，人人都話係金仔同侵侵搞事，無情情話要開拖？但絲絲發覺令股市大跌原來另有其人！嗰位大人物可說「股市剋星」，股民見到佢都要退避三舍。無錯喇，之咪又係佢囉！

相信各位股友或網友都心水清，一早估到又係秋官（鄭少秋）作怪，原來佢今年九月將會響澳門開演唱會囉！「丁蟹效應」真係無人能擋，遠至澳門一樣邪住港股，而且好死唔死，門票公開發售日期就係周四朝早十點。由周四起，恒指兩日夾埋跌咗近千點（實數873點）呀陰公！

丁蟹威力向來耍家，好似去年佢同莫文蔚為周星馳新片《美人魚》錄插曲，恒指在該月短短二十日就累跌逾3千點喇！所以話，秋官，下次開咪可否事前單聲呀？

余絲韻