今次我開宗明義要講三隻股。甚麼開場白都唔講喇，驚篇幅唔夠。首先要講的是我的第四愛股，即係「四寶」丘鈦科技（01478）。我於4.36元買入，再於今年一月的talk騷上推介。公司於年初發盈喜之後爆升，發業績之後再爆。近日，同樣劇本又再翻炒：股份於六月底發盈喜，星期三發業績，期間股價炒到上10蚊，昨日再爆升28%。
第二隻要講的是我的第二最愛，即係「二寶」舜宇光學（02382）。我於去年六月，英國公投脫歐後於27元買入。又係從盈喜炒到出業績，再揸到今年的盈喜，然後再等業績。業績將於下星期一發布，屆時有無可能像丘鈦一樣爆上加爆呢？我想，有這個可能，昨日已率先變身紅底股。
第三隻要講的並不是我的愛股。嚴格來說，我對佢一啲feel都無，是美圖公司（01357）。我無份於23蚊的紫禁之巔度買佢，不過於近來9到11蚊的時候食過一浸。我對公司無好感，主要是因為佢長期虧損，而且股價大上大落。但問心吖，這類型波幅股份才是投資人眼中的瑰寶！
今次我將兩隻好股同美圖擺埋一齊，無意抬高美圖價值，只是想提醒大家，他們都可能即將升呢。我所講的是：恒指服務公司於十六日做季檢，其中舜宇可能會染藍。接着，深港通都會更新南向投資的標的股份名單，我懷疑會有丘鈦。
再到月底，MSCI中國指數會換貨，你仲記得美圖於上一次點解會「撻Q」嗎？是因為股份並非全流通，該狀況於六月已經解決喇。我想講咩？你自己諗吓啦！不過我都係戴番個頭盔先，按常理推斷咋，無包生仔的！
富昌金融研究部總監 譚朗蔚（作者為註冊持牌人士，持有丘鈦及舜宇）