高盛相信係好多華爾街打工仔嘅目標，但要成為高盛一分子一啲都唔易，除咗要學歷彪炳或者經驗豐富，最新仲要通過佢哋嘅「性格測試」，真係要過五關斬六將先得。
高盛招聘主管Matt Jahansouz話，會喺出年嘅夏季實習職位招聘開始採用「性格測試」，未來嘅應徵者都會喺第二輪面試之前進行「性格測試」，作為最終會唔會獲得聘書嘅考慮因素之一，當然面試仍然係不可或缺嘅一環。
所謂嘅「性格測試」，係將應徵者嘅答案，同一啲在職高盛員工進行對比，而呢啲在職高盛員工喺團隊合作、分析力同判斷力等方面都具有優秀表現，咁就可以睇吓應徵者係咪都具有呢啲特質，至於「性格測試」嘅形式同問題類型就不得而知嘞。
無可否認，讀書攞高分未必等於喺職場上有好表現，正如Jahansouz所講，依家呢個世界已經改變，唔能夠單單靠睇學校成績或者履歷表嚟請人。
睇嚟有志投身高盛嘅人，唔單止要努力整靚張「CV」，仲要學識「做人」呀。
余絲韻