絲絲講場:中信里昂開Talk 「水神」撐場

中信里昂每年喺香港搞投資論壇,都例牌會請特別嘉賓,仲要專揀金融界以外人士,話希望畀投資者擴闊吓眼界咁話。

今年都唔例外,請嚟人稱美國「水神」嘅游泳好手菲比斯(Michael Phelps),嚟緊九月中將會「游」到香港!

菲比斯自從參加完二○一六年巴西里約奧運後就宣布退役,要數佢最近一次「復出」,就係早排上節目,去到南非同大白鯊比賽。

中信里昂話,今次請嚟個人擁有23面奧運金牌、獎牌總數達到28面嘅菲比斯,屆時佢將會同現場投資者分享運動生涯嘅點滴。唔知叫佢喺咁多人面前講自己過往經歷,會唔會令佢勾起種種回憶,搞到心思思想真正復出呢?

嘉賓仲有英央行前行長

其實中信里昂論壇每年都花盡心思,請過唔少猛人撐場,早年有碧咸、美國前總統克林頓、荷里活金像獎影帝尼古拉斯基治等名人,前年仲透過衞星通訊請到遠在莫斯科嘅美國「走佬特工」斯諾登(Edward Snowden)交流,夠爆唔夠爆?

相信想一睹「水神」風采嘅人應該都唔少,加上今屆論壇嘉賓仲有英倫銀行前行長金默文(Mervyn King)同埋希臘前財長瓦魯法基斯(Yanis Varoufakis)等,現場一定逼爆人!

余絲韻