孖妹S檔案：央行謀退市 股匯炒多轉

各國經濟篇 特朗普開空頭支票

洪：交銀國際董事總經理兼研究部主管 洪灝

盧：天王國際首席策略師 盧楚仁

彩兒：近年環球股市真係多得多國央行嘅寬鬆貨幣政策。喺震撼股壇嘅○○年科網泡沫爆破之後，美國聯儲局冇計之下就用減息嚟對抗經濟衰退，點之搞出個大頭佛，○七年嗰陣，美國以至部分歐洲國家驚現次按危機同埋房地產泡沫，最後泡沫爆破，搞到倒瀉籮蟹。

Kitty：嗰次簡直完美演繹咗乜叫「骨牌效應」，雷曼兄弟執咗笠，呢鑊咪係史上最甘嘅金融海嘯囉，因為美國聯邦基金利率已經去到零，傳統幣策已經冇晒符弗，於是聯儲局就推出咗三輪量寬（QE）措施，喺市場買大量國債同埋按揭抵押證券（MBS），變相向市場泵水，力求穩住市況，喺一三年十二月，佢哋開始咗退市計劃，QE嘅買債計劃去到一四年十月就正式玩完。

交銀國際洪灝認為，未來一個月大市出現大調整並唔出奇。	天王國際盧楚仁稱，想賺息又賺匯價，下半年首選人民幣。（朱晉呈攝）	究竟金融海嘯至今各國央行放咗幾多水？

退市收水縮表循序漸進

彩兒：喺○九年年底開始，歐豬五國接連引發歐債危機，歐央行行長德拉吉為咗擺平事件，喺一五年九月仲宣布喺二級市場無限量買債，舊年年底又添食，將原本今年三月到期嘅買債計劃延長多12個月，但係就將今年四月打後嘅買債規模由800億歐元縮減到600億歐元，第日想全身而退真係有咁易？

盧：我覺得大家要搞清楚「退市」、「收水」同「縮表」（縮減資產負債表）嘅意思先，收水同縮表係兩回事，美國推咗3輪QE，推完唔再推就係退市，依家縮表就係退市之後，將市場嘅錢收番去央行；歐央行都講明秋季會討論退市，英國醞釀緊下月加息，市場預計佢加息後會退市。

洪：想了解環球央行放水幾多，可以睇吓央行資產負債表擴大幾多，人行好誇張，同期升咗5倍以上，部分係外匯佔款擴張，喺市場上回收美元，再發行人民幣，所以人行擴張快原因唔一樣。美國聯儲局舊年四月起停擴張，歐央行、日央行仲擴張緊，人行係唯一縮緊表嘅央行，主要原因係外匯流失咗約一萬億美元。

歐央行加息退市交叉點

Kitty：見到耶倫BB話縮表之後，美匯都止唔到血；歐央行提退市，歐元就升，我真係睇唔通囉！

盧：雖然歐央行口風同美聯儲縮表都係收緊貨幣政策，但美方講縮表後，美匯一路跌，而歐元、英鎊、加元等都強勢，主因美國經濟數據係差過人哋，再加上美國總統特朗普上場後，空頭支票不斷兌現唔到，例如醫改通過唔到，喺經濟麻麻、問題多多之際縮表，令市場心慌，雷曼爆煲後美國資產負債表係約9,000億美元，依家已達4.5萬億美元，負債與GDP比率不斷惡化。

歐央行本身有兩個工具可用，一係加息，一係退市，我估計佢九月會加息先，將利率正常化，其後先退市，若干年後先好似聯儲局咁縮表，若歐洲加息或退市，會畀市場正面印象，皆因經濟好先可以咁做，但有機會引起拆倉潮從而利淡歐股。

德日倘拋售債券 影響大

彩兒：不如拎個水晶球出嚟睇下，卜一卜多國央行幾時收水？

洪：環球央行收水時間表，主要取決於通脹預期……我喺舊年下半年開始見一浪大宗商品價格飆升，令環球生產物價指數（PPI）急升，同時帶動消費者價格指數，不過去到今年三月份，大宗商品階段性見頂，同埋環球PPI明顯見頂，油價今年處於比較波動嘅大環境，亦冇見到勞工薪金有上行壓力，所以通脹壓力、對通脹預期下行緊，唔支持加息，加息機會愈嚟愈低。

央行想縮表，取決於對市場利率嘅衝擊嚴重程度，好似德國咁，已經將市場可以買嘅債買晒，日本又如是，央行將手上嘅債拋出市場，市場會受影響。我認為一係央行不斷拋售債券，國債利率飆升，衝擊其他資產價格，或者強通縮預期下，央行拋售債券而市場不斷吸納，債市會跑出，但對其他資產有衝擊。

Kitty：即係要摸着石頭過河，我哋至叻o架喇！

股市策略篇 回調首選大型股

彩兒：港股升咗咁多，唔通做好友仲有運行？

洪：內地經濟的確係放緩緊，但情況比市場預期中好，消費對GDP貢獻上升，可見增長放緩，但結構有改善，供給側改革見到成效，救到上游煤炭國企，因應消費增長，而內地居民儲蓄比率高企，利好消費類股份前景，所以汽車、白酒，以至海外上市嘅電商企業股份都有強勁嘅表現。

我認為恒指今年最高位未出現，初步睇28,000點，不過未來一個月大市出現大調整並唔出奇，市場亦等緊回調，喺經濟增長冇出現大問題下，劇烈回調就係重新買入嘅時機，而A股趨勢同香港應該係一致，市場利率上升機會大於下降，意味經濟增長OK，所以應該首選大型股，主因呢類股份喺經濟周期下半場走勢會好過小型股，呢個趨勢延續至下半年。

睇好iPhone供應鏈廠商

Kitty：老老實實，央行退市有乜受惠股？

洪：喺環球央行收水下，金融、互聯網、科技、消費板塊都可受惠，而原材料板塊可區間炒作。另外，科技股主要受惠蘋果公司iPhone換機周期，新機第四季未必應到市，市場對iPhone 8抱大期望，所以對供應鏈廠商盈利提升嘅預期會延續到明年上半年；互聯網板塊係巨頭玩晒，騰訊控股（00700）、阿里巴巴集團同埋京東優勢都會持續，更會加快吞併市佔率。

我長線睇好消費同醫療保健股，皆因人口老化問題，年輕儲錢到老使，儲蓄轉化成消費，加上中國係實行網上付款嘅領先地區，例如直播網上打機，再喺微信收打賞，顛覆傳統消費概念，呢個趨勢只係起步，佔GDP增長約六成，未來見到10至20年，消費會喺GDP佔重要席位；金融股或受惠息差擴闊，喺經濟周期下半場值得睇好，加上內地金融股僅6至8倍市盈率，市帳率（PB）只係0.7至0.8倍，相信下半年有力做好。

外幣策略篇 追YEN博突破108

Kitty：聽你口脗，似乎應該一味避開美元，擁抱非美貨幣喎！

盧：估計耶倫只會展開縮表計劃，等下任主席接手，相信會逐步減少再投資嘅額度，若縮表主力用呢個方法，對市場嘅衝擊會細好多。歐洲就要睇住歐央行加息定退市先，但兩邊都利好歐元。個人覺得英國八月頭有六、七成機會加息，退市就言之尚早，英鎊在加息憧憬下會向好。

加國已經加息，澳洲今年年尾至明年初都有機會加，基本上短期內冇機會加息、退市嘅就只有日央行，行長黑田東彥之前話十年期國債孳息率徘徊0.11厘，就會無限量買債，將息率壓番低，所以日本短期內都會維持寬鬆貨幣政策；日圓兌每美元約113水平宣布無限量買債，跌到114.5止步唔跌，即使佢加碼QE都好，只會短線一跌就再炒上，日本政經愈唔掂，日圓匯價就愈掂。可承受風險者可以炒日圓，由三月至今都係108至114.5大型區間上落，日後突破108機會較大，一旦出現，作為投機者可追揸，此前就可以炒住Range先。

澳幣紐元定存息最吸引

彩：若然係唔鍾意「炒炒聲」，愛安定嘅投資者又可以點？

盧：美元弱，港匯更弱，外匯市場多生意，人民幣定存熱爆，近期可以揀美元以外的貨幣投資。風險承受能力較低者，想賺息又賺匯價嘅話，下半年首選人民幣，離岸價6.72關口頂住，由於內地GDP靚番，人行有可能收緊幣策，而且中國係世界工廠，環球經濟好轉下可受惠，最理想可吼人民幣兌港元回落至1.1488做定存。

歐元、英鎊、瑞士法郎、澳元、紐元及加元後市都向好，但係，匯價升得過高，最好吼美元反彈時先做外幣定期。我最睇好澳、紐元，因為佢哋息率最吸引，中國經濟好轉，澳洲受惠，貴金屬價格上升，相信佢可以繼續做好，紐元就好跟澳元走，所以都值得睇。

Kitty、彩兒

若有料報畀彩兒同Kitty或有嘢問，可電郵money.biz@on.cc