Market Insight：電訊股落後總有因

回顧呢次升浪，合埋雙眼唔大唔重磅唔買，贏錢的機會率好高，但有一隻巨無霸算係例外，就係中國移動（00941）！

買中移等運到好犯本

查實，三隻中資電訊股七月份表現都唔多精神，都係先跌後回穩，其中中移就落過80元關，七月下旬最威亦只不過係彈過上84.75元，以上周五收市價83.45元計，按月僅微升0.7%，真係睇見都唔多開胃。不過，總有人覺得，港股大漲小回，最終點都會輪到中移呢隻重磅股發力，所以做定好倉部署等起步。

古勝的睇法係，一隻股份積弱有其原因，在未見到資金大舉離開強勢股前，照計呢類弱勢股仍難有運行，除非行業整合方面有重大利好突破。正所謂「寧買貴莫買錯」，所以都唔太主張重錘跟進呢類弱勢股等炒上，免得犯本兼浪費銀彈，小注吼吓中長線輪證，叫做畀啲藉口等自己時不時留意吓，都還可以接受。

能源股神華係首選

八月份港股將進入業績高峰期，今日焦點應係滙豐控股（00005）業績。本來老散們都有憧憬，可惜睇見上周五友邦保險（01299）份業績靚仔，但股價卻跌近2%收場，唔多唔少打擊咗持倉信心。

在下相信，滙控業績唔會差，而焦點之一乃公司是否有新回購計劃。睇圖表六月尾股價突破後，一直沿10日線上升，短線若有回吐守得住10日線，可當短線整固論。

唔少中資板塊都輪流接力炒上，落後板塊除咗中資電訊股之外，電力股表現亦算係一個表現欠佳的板塊。理論上，內地經濟回暖，應該可以率先體現喺電力需求上。可惜從近期個別電力股最近就上半年發盈警可見，煤價回升打擊了業績表現，故見板塊氣氛持續跟唔上。

古勝相信上半年數據係滯後，到底電力需求改善的趨勢能否持續，甚而抵銷煤價上升的影響，大概第三季營運數據可提供更多指引。此外，有關重組成三大能源企業的進展亦宜密切留意。不過，若要選能源股，中長線首選還是中國神華（01088）。

領展有貨可以安心坐

領展房產基金（00823）擬就資產組合進行策略性評估，市場估計會將重整效益不大的物業賣走，套現用於減債、併購或回購股份。受消息刺激，領展上周五再創新高64.5元，收市則升1.8%報63.9元。

評估組合助提升回報

老實講，站喺營商的角度，領展班管理層表現真係幾出色，將舊物業翻新並強化現代化管理，成功提升租金回報，將缸瓦變成瓷器，若見回報率冇得再升，就善價而估，做佢股東年年財息兼收，都真係幾爽。之不過，作為一間將公家資產打包上市的公司，也許屋邨小商戶同居民都未必受落領展事事唯利的做法，一嚟翻新商場租金狂升，二嚟個個屋邨商場都好似倒模咁，全為連鎖式商店，消費貴又冇選擇，呢啲就係所謂的「順得哥情失嫂意」。

本來，冇大動作的話，在下認為領展價格去到60元邊，經已升得差唔多，誰不知最近又證實為資產組合進行策略性評估的消息，既然係咁，都無謂估頂，反正有貨繼續坐，冇貨就暫時觀望住，睇回吐承接再作打算。

古勝