絲絲講場：「幾粒鐘首富」一日怎麼過？

貝索斯唔Like鬧鐘，每日瞓足8粒鐘自然醒，然後同佢位小說家太太食早餐。早餐佢至愛八爪魚，話愈唔知係乜嘅嘢愈想食。每朝佢都留番同太太及四個仔女一齊過，所以早上公司開會？No Way！

貝索斯唔Like開會

佢唔Buy開會呢套，連亞馬遜嘅投資者，一年加加埋埋都只係見得6粒鐘。佢仲有個「兩個Pizza原則」，即是開會者，唔超過可以用兩個Pizza招呼得到嘅人數。佢亦知自己做老細火爆，聽講特別請人訓練自己平復情緒。

佢喺亞馬遜作風節儉，員工想好似其他科企咁有免費午餐或按摩？Forget It！佢話公司樓下大把流動小食車。

貝索斯出晒名係電影及連續劇《星空奇遇記》嘅超級Fans，舊年套《星空奇遇記：超域時空》佢甚至出場扮外星人。佢仲係一個火箭迷，時常帶埋仔女坐潛艇打撈海底嘅美國太空總署舊火箭。點解除咗亞馬遜之外，佢仲搞多檔航天生意Blue Origin，明晒！

而喺屋企，有樣嘢佢每食完晚飯必做嘅就係親自落手洗碗！佢話自己洗碗最Sexy。點性感法？各位自己想像。

次季純利大跌77%

講番亞馬遜業績，第二季收入雖然大增25%至380億美元，但僅賺1.97億美元（約15.37億港元），倒退77%，並創近兩年新低，每股純利為40美仙，遠遜市場估計1.42美元，主要受龐大投資拖累，第三季盈利預測亦差過預期。

周四股價收市倒跌，貝索斯身家回落至893億美元，跌番落蓋茨之下。亞馬遜股價周五早段受壓，低見1,001美元，挫4.3%。富貴如浮雲，貝索斯瞓足8粒鐘自然醒又係第二日！

余絲韻