Market Insight：息口敏感股毋須睇淡

縮表影響力有限

議息結果公布後，美債息急跌，美匯指數跌到超過一年新低。五月美國核心PCE物價指數落到1.4%，與2%通脹目標漸行漸遠，加埋早排倫媽講過中長期美息已去到中性水平，揭示息口再升空間有限。

近排如同老僧入定一樣的息口敏感股，議息後有啲反應，領展（00823）、新世界發展（00017）及新鴻基地產（00016）昨日走勢標青。

話就話聯儲局縮表殺埋身，不過每月講緊從債券及MBS市場回收300億至500億美元游資，相對4.5萬億美元的資產負債表，實在濕濕碎，一來聯儲局目標二○二一年將資產負債表縮番去2.8萬億美元，換句話，抽走唔及過去幾年放出來的一半。

況且雖然聯儲局收水，但如果經濟及物價表現唔對辦，佢哋冇話唔會掉頭減息甚至重推量寬，成個市群起隊散美金，並非無因。隨着美息中短期見頂或快將見頂，香港地產股或者REITs如領展、置富產業信託（00778）一類，下半年到明年初又可以睇番高多少。

科網一哥爭逐白熱化

聯儲局議息結果公布後，股市恐慌指數VIX跌落8.84的歷史新低，華爾街對後市樂觀到爆燈。雖說股市眾地勿企，人人貪婪要學會恐懼，但一樣有句叫升市莫估頂，尤其牛三往往是升浪中最燦爛的一段，同個市死過之餘，抱住臨尾隨時輸番一劑，有晒心理準備就有備無患。

港股升勢已經自動波一樣，昨日攻破兩萬七關，再升190點收報27,131點，最恐怖係個市咁升法，成交依然維持八、九百億元的不慍不火的水平，反映錢多貨少的基金，以至懼高的散戶仲未有恐慌性追貨動作。

騰訊控股（00700）繼續擔當升市火車頭角色，昨日升2.4%收報308.4元，再創新高。至於喺美國上市的阿里巴巴（BABA），周三晚同樣高見155.79美元的收市新高，後者市值3,994億美元，相等於3.11萬億港元，騰訊市值2.92萬億港元，中國新經濟一哥的爭逐，進入白熱化階段。

碧桂園買得較安心

受惠於國際油價回升，中石油（00857）發盈喜，估中期盈利勁升至90億至110億元人仔，勁升16至19倍。誇張的升幅，與前年同期比較基數低到離譜，只得5.28億元人仔有關。

中石油盈喜根本不是一回事，投資價值取決於未來美金有幾弱，油價可否重返50至55美元水平，影響更大，基於中長線睇淡美金關係，調整之後的「三桶油」依然有撈底價值。

見到坊間分析，試圖為近排內房股強勢作解釋，計古勝話根本攞苦嚟辛！永恒不變定律─股市買的人多沽的人少，股價自然升。港股A股化，近年內地資金參與程度日增，腰纏萬貫的內地基金與莊家南下搵食，根本唔需要搵理由。

內地資金收乾貨

正路睇，年底前舉行十九大，斷估未來兩三個月，樓市調控措施鬆手機會相對微，內地樓市在成交趨淡，樓價升幅繼續放緩下，照計無乜炒的理據。不過，內地資金收得乾身，將幾隻大市值內房股舞高弄低，中國恒大（03333）裂口再裂口，講真唔敢掂。反而係，今年預計會加入四千億俱樂部（全年銷售額）的碧桂園（02007），啱啱先破10元阻力，純炒勢，古勝情願揀佢。

古勝