絲絲講場：想借平錢先執靚個底

查實會睇自己份信貸報告嘅人有四類：48%係管理信貸人士、36%係尋求信貸人士、14%係改善信貸人士，仲有2%係預備破產人士。點解預備破產嘅人會「自查」呢？環聯亞太區總裁及環聯香港區行政總裁莊永楷指，呢批人或希望查閱報告後尋求債務重組方案。

好喇，究竟查閱信貸報告之後有咩着數先？調查指出，消費者查閱信貸報告前嘅貸款年利率平均為23.7%，查閱後則下降至18.9%，借款年利率下跌4.8個百分點；如果以借私貸為例，意味借款人每月可節省500至700蚊。

切勿拖數或使凸

可能大家未必清楚信貸評分有咩用，其實信貸評分愈低，借款成本一般愈高！環聯數據顯示，信貸表現一般嘅EE組別借款人貸款利率約28%，借錢成功率約39%；而信貸表現較差嘅HH組別借款人貸款利率則約47%，借款成功率僅約19%，差距極大！

查閱信貸報告後，最重要係透過行動「執靚個底」。莊永楷提醒，影響信貸評分嘅兩項重要因素係有冇「逾期還款」及「超逾信貸額」。所以大家醒水，唔好拖數同使凸！

余絲韻