孖妹S檔案：潛力績優股 原來要咁搵

近排無炒過不妨留意

李：鼎成財富管理行政總裁 李明正

彩兒：中國重汽（03808）上星期發盈喜，一度刺激股價勁升逾36%，超勁！可唔可以幫手捉吓盈喜股？

李：中美經濟逐步好轉，聯儲局已開展加息期，歐洲又有機會退出量寬，可見環球經濟已走出谷底。近期市道係資金輪流炒，之前有內房、內險股，之後汽車股，去到近期就輪到手遊同手機設備股，業績明顯反映經濟復甦，我覺得炒業績會係嚟緊嘅主題之一，特別係近期投資者投資氣氛熾熱番，二線汽車股、有色金屬落鑊，「一帶一路」國策股係受注目，都唔及啲業績有實質好轉嘅公司咁渴市。

Kitty：見過鬼仲唔怕黑咩，見到啲公司盈喜，都唔敢咁老定！好似高陽科技（00818）夠發盈喜啦，點知我睇清楚通告先發現佢盈喜主因係一次過收益及營業額大幅飆升約七成，呢類盈喜要小心喇，未來盈利增長冇乜保證。

李：揀板塊嗰陣，最好就梗係揀啲近排無炒過嘅啦，曾經炒過嘅，資金翻炒機會低。我認為資源類股份，包括有色金屬都有機會，尤其係去產能有成效嘅資源股，受惠去槓桿化嘅基建股相信未來都會有優勢，股價可以受盈利提升同重新估值推動，所以值博。

留意一二線資源股

李：個股方面，我比較睇好一、二線資源股，例如江西銅業股份（00358），睇到來自基建嘅實體經濟需求向上，撇除一帶一路發展，單單睇番內地城市化發展，進度只係約六成，仍然係高速增長，對資源、基建需求仲係好高；依家處於網絡時代，稀土同有色金屬等資源對電子產品同相關基礎建設好重要，近期稀土土質資源價格上升咗，預期盈利會受惠於金屬價格提升同埋需求帶動，心水股係中國稀土（00769），估值有機會重估。由於市場春江鴨眾多，現時大市處牛三、小回大漲格局，股價易喺績前炒起，我建議都係提早買入，值博率較高。

小心個別細科技股

彩兒：今年藍籌股竟然係唔少股友「主菜」。

李：我覺得大價股最好炒都係騰訊（00700），雖然佢已掂過300元，但我認為佢股價係暫時不設上限，一來佢帶動恒指上升，二來佢業務性質喺內地新經濟體系入面，影響人口眾多，股價300元未反映晒潛力，只要有一、兩項新業務就足以成為催化劑；但一啲跟炒嘅中小型科技股市盈率高企，部分盈利係靠融資、收購合併而嚟，非實質盈利，小心中伏。

滙控友邦中銀惹憧憬

尹：傲揚集團投資總監 尹滿華

Kitty：次次業績期總有幾隻股係「主角」，好似滙豐控股（00005）、友邦保險（01299）咁都例必炒味濃，今次又玩唔玩得過？

尹：金融股入面，我覺得呢兩隻今次都會照舊喇，仲有隻中銀香港（02388）都值得諗諗喎！呢幾隻大藍籌，近年業績表現唔錯，又或者業績比市場預期好，績後股價都會做好，所以可以現價買入博一博。

隻五號仔，之前市場怕佢受脫歐、違規罰款所影響，但隨住脫歐事件去向平穩，歐元回升，而且違規事件最壞、最影響公司嘅時間已經過去，市場憧憬佢業績公布時，再講回購股份嘅時間表，我覺得今年或者會有業績以外嘅驚喜；友邦呢，之前市場就怕佢受銀聯限制，令內地客資金嚟唔到香港落單，但睇番上年對公司生意影響唔算大，上半年業績可以解開呢個疑團。另一方面，中銀香港早前賣咗集友同南商，資本水平強勁，憧憬佢業績或派特別息，同埋公司或者會喺收購方面提速，有新進展。

中鋁洛鉬望入佳景

彩兒：睇嚟近期大熱係博資源股業績有反彈喎，不過咁刺激，唔係個個股友都啱。

尹：今轉業績期我最留意都係資源股，大宗商品喺舊年開始復甦，特別係稀有金屬同有色金屬添，我覺得呢類公司畀到市場Surprise嘅機會大，反而內房股同汽車股已經炒過，好難再有超乎預期嘅消息。我特別睇好中國鋁業（02600）同埋洛陽鉬業（03993），因為內地鋁業已由產能過剩走向供需平衡，鋁價逐步攀升，行業最難捱嘅時間已過；洛陽鉬業主要生產鉬同鈷，係新經濟產物、高科技產品，例如電動車所需，需求大、價格上升空間自然大。

盈喜原因須了解清楚

馮：長江證券資產管理（香港）董事總經理 馮時煖

彩兒：唔知係咪因為侵埋北水玩嘅關係，香港嘅炒風唔同晒，點捉路？

馮：業績期今個星期開始進入高潮，我哋都要跟風轉換吓投資策略喇，依家香港股市投資風格轉咗，以前好興好消息出貨、壞消息入貨，但依家係見好消息就要追貨，壞消息就繼續沽貨，風格由價值投資轉為趨勢投資，以前股份發盈喜會令投資者出貨，依家就反而會再吸納，仲引埋其他資金入市添。不過，就要睇清楚盈喜嘅原因，如果係特殊性收益就要留神喇！

內房睇土儲毛利率

馮：我覺得科網股嘅好消息盡出，好難有驚喜，有部分汽車股發展海外市場、推新能源車等，呢類貢獻無咁快喺盈利上反映到；反而內房會有啲機會，皆因過去半年市場怕內地樓市調控對佢生意有大影響、憂慮銷售情況、泡沫爆破等，但過去擔心嘅嘢似乎無乜出現，我認為二至三線內房股發展空間較大，因應內地地價高企，最好揀土儲較多、毛利率保持穩定嘅公司。

Kitty：今年市旺，魚缸股友都好雀躍。

馮：雖然美國加息，但香港市場資金充裕，息口仍然低，股市氣氛暢旺，對金融股，例如港交所（00388）有利好作用，至於券商股，散戶想揀都唔係咁易，最好都係揀過去三至五年有穩定盈利嘅龍頭股，比較穩陣。

業績期揀股致勝錦囊

部分股份公布業績時間表

彩兒、Kitty