Market Insight：聯想AI夢引發炒風

早兩日國際院印發《新一代人工智能發展規劃》，有興趣大家不妨上網搵嚟睇睇。粗略講，係關於以AI（人工智能）改善民生，配合產業升級，目標係二○二○年中國人工智能同世界先進水平睇齊，二○二五年達到世界領先水平，二○三○年要領先世界。

恕古勝才疏學淺，圍棋AI一年內先後打敗南韓及中國圍棋第一人，先吸引在下去睇睇AI的技術文章。國家目標能夠實現的機會率有幾高，畀唔到數字大家，但呢類國策吸引到資金進場卻幾乎可以肯定。

上星期聯想集團（00992）在上海Tech World率先為外界表述其AI夢，延續上半年提過，準備投資12億美元開發之外，今次CEO楊元慶更豪言，聯想要押上身家性命去發展AI。

興乜做乜，一窩蜂從來是內地企業老問題，早幾年聯想大舉進軍手機及流動穿戴裝置，唔提當無做過就算。不過，老老實實，優於硬件的聯想，在內地AI能否勝過早起步的百度都係問題，但股市從來問因由唔睇結果，聯想股價亦都沉咗一段長時間，藉消息炒番轉唔奇。上周五衝過上5蚊樓上縮返落嚟，如果日內見鑊氣配合再上，如可以突破5.2至5.35元之間阻力，應該仲有大把世界。

聯通可望子憑母貴

為國企引入民間資本的混改主張，一直久聞樓梯響，卻遲遲未見重量級企業落地，上周五市傳中國聯通A股（600050.SH）混改快有下文，涉事的不單止有上個月底盛傳的騰訊控股（00700）及阿里巴巴，最新的版本仲有百度及京東，涉及總投資額過百億美元。

傳言中主角，喺周末期間照例耍手擰頭否認。不過，話說回頭，聯通A股四月開始拉閘，成為混改落地的主角幾可肯定，問題只係邊幾個大孖沙會參加呢次畀面派對。

傳聞中的四大科網巨擘，平分百多億美元不過「散紙」般的投資，揼心口搵佢哋一啲都唔出奇。上周古勝話今浪中資電訊及石油股完全無炒過，資金追落後隨時輪到佢哋，周五見中國移動（00941）已經率先發難，今日會唔會真係輪到聯通（00762），朝早不妨留意是否有異動，博搭番轉順風車。

信置投地 惠及新地

看風轉舵，從來都係衍生工具及期指炒家生存之道，港股終於停步，為連升九日且技術早已超買的恒指來個整固。上周五美股早段微跌，夜期卻見一浪低於一浪，埋單再比日市跌104點，似預示連升兩周的港股周初應有一定的獲利沽盤浸出，想入市的不妨等等。

本地薑贏番次過江龍

近年，內地發展商來港頻頻高調奪得招標土地。上周五馬鞍山白石臨海豪宅地賣地結果揭盅，本地薑信和置業（00083）以平均每呎地價1.16萬元貼近上限奪得地皮。到底係咪近排阿爺對內企海外投資活動睇到實，影響到過江龍出手無咁闊綽？古勝不得而知。

然而，地皮成交價比兩年前鄰近土地成交價高出近七成八，亦差不多與目前同區二手樓價相去不遠，打番至少5,000蚊呎建築成本同兩年利息落去，似乎未來烏溪沙新盤開兩萬蚊以上會係常態，相信大家當年做靚仔入去郊遊宿營時，諗都無諗過。新地（00016）行入少少有個規模大得多、涉及266萬呎的十四鄉項目，睇嚟消息下，最着數係佢，今浪無乜點升過，今日個市回無嘢好買，可以睇番佢。

古勝