絲絲講場：想股匯齊升靠費達拿贏波？！

想知個市走勢，睇Fed（美國聯儲局簡稱）不如睇另一個Fed（瑞士網球天王費達拿（Roger Federer）嘅暱稱）好過？！

係彭博財經評論員Marc Cudmore話嘅，佢話睇番過去十四年溫布頓網球公開賽男子單打賽事，凡費達拿奪冠嗰七年嘅MSCI新興市場指數同MSCI新興市場貨幣指數都包升，相反費達拿輸咗嗰七年，有五年呢兩個指數都跌！

Cudmore按往績分析，費達拿贏波就利好新興市場，佢死敵祖高域就係煞星，奪冠三次，嗰三年嘅新興市場同歐元就唔掂。至於拿度贏波就利好瑞郎，梅萊贏就利好發達國家嘅股市！咦，費達拿啱啱上周日第八次贏溫網男單，嚟緊股市咪會升？

連九月聯儲局會否縮減資產負債表同加息，美銀美林都話要睇費達拿喺美國網球公開賽嘅表現！

美銀美林分析師Chris Flanagan上周出報告話，費達拿喺美網男單嘅戰績，呢十三年來完全拍住聯儲局息口走勢，佢○四年首奪冠，聯儲局就進入加息周期，喺佢接連奪冠嗰五年息口Keep住高，到○九年冠軍寶座斷纜後，息口同佢就頹足差不多九年，巧合到連Flanagan自己都話好詭異！

「費達拿魔咒」會否應驗？不妨睇住九月十日嘅美網男單賽果！

余絲韻