Market Insight：內險板塊備受青睞

眼前恒指向上26,000點頂到實，向下要睇番24,800至25,000點，現時指數值唔值博，留畀大家自己諗！

昨日有兩單大刁吸引市場目光，其一係中遠海控（01919）以逾492億元全購東方海外（00316），其二係萬達集團旗下萬達商業向昨日停牌的融創中國（01918）出售西雙版納萬達文旅等13個文化旅遊項目城項目股權及北京萬達嘉華等76間酒店，共涉資632億元人仔。

中遠海控再升級

先說前者，航運業的大舉措，由於中資出價吸引，相信成功機會大，而若順利完成交易，中遠海控將進身全球三大航運企業，難怪昨日該股亦見有資金吸納，收報4.29元，升5.4%，成交4.35億元。

至於萬達與融創的交易，以融創現時市值才577億元，吃下逾600億元資產，都真係唔講得笑！呢單刁，古勝第一個感覺係融創何來咁多銀両？

萬達酒店博大霧

不過，據報融創管理層話，交易涉及資金完全來自融創自有資金，截至六月底止，公司帳上還有九百多億元現金，即係冇大問題，到底今次融創係咪執到好嘢就要等雙方披露交易詳情先知，但萬達能夠套現大筆錢，就應該可以大減財務壓力。

反而較為無厘頭係，主力做海外項目的萬達酒店（00169）竟然一度搶高逾倍至1.48元，收報0.85元，升46%，成交1.55億元，上晝落場喺1元樓上高追者，若然未及落車，唔知有冇仇報。

誠如在下早前所言，騰訊控股（00700）被官媒批評呢單嘢仲有手尾，冇咁快擺平，而三大中資電訊股走勢又唔多靚仔，啲資金會泊去乜嘢板塊呢？從資金流動可見，似乎部分選擇泊喺內險股。昨日見到多隻內險股股價發力，其中中國財險（02328）升近4%，中國平安保險（02318）升1.2%，兩者股價均創出52周新高；中國太保（02601）及新華保險（01336）則有回吐，輕微低收。

國壽可分注收集

照計，以目前內地金融市場情況而言，系統性風險基本受控，加上A股確認明年入摩，以A股目前的估值水平，在排除經濟硬着陸的風險之下，中長線有一定的值博率。睇好A股前景的話，內險股自是受惠板塊之一，故剛踏入第三季，已見部分芬佬選擇增持優質內險股，亦不足奇。

在內險股中，平保仍是強勢之選，若想追落後，可留意中國人壽（02628）。過去一年國壽股價反覆向上，現價正處上升通道底部，中線23元水平可分注收集，目標再衝26元阻力區，初步支持在次季低位22.3元。

古勝