絲絲講場：龐寶林講股唔畀冧巴
見到出名嘅股票分析員，好難忍住唔問佢攞股票貼士炒番轉。東驥基金管理董事總經理龐寶林最近搞咗個Talk（講座），但佢就特登唔畀「冧巴」。點解嘅？
話說，領展（00823）「商戶學堂」請咗龐寶林教小商戶投資心法，代表香港股票分析師協會去講Talk，屬於協會嘅社會責任活動。龐寶林話，因為自己同時身負香港財務策劃師學會主席身份，所以唔希望畀「冧巴」教人短炒，反而希望嚟聽講座嘅小商戶認識長線投資增值。
龐寶林講解埋巴菲特與索羅斯投資上有乜共通點，有咩可以喺佢哋身上學到，所以個Talk堅學到嘢o架。佢話現場百幾個聽眾，起碼冇見人低頭玩手機。可能大家都希望將生意上賺到嘅錢，再喺金融市場滾大佢。
余絲韻