絲絲講場：黃金期貨開鑼 小加玩鑊「金」

正當大家等待港交所行政總裁李小加與證監會行政總裁歐達禮一齊敲鑼之際，佢哋就話有別傳統，今次派出兩個Golden Kids嚟主持開市儀式。

勁冧金童兼派「金幣」

敲鑼前，小加仲問對金童練習過嘛？夠唔夠大聲（口架）？金童即刻點頭話「夠！」唔好睇小呢對運財金童，敲起來實情同平日大人差唔多大聲！小加對金童簡直愛不釋手，用英文細細聲提佢哋要笑，又摸頭又攬，之後仲索性抱起埋其中一個。

小加將港交所上市嘅「人民幣黃金期貨」與「美元黃金期貨」同埋LME上市嘅「美元黃金期貨」，稱做佢哋嘅三隻「黃金寶貝」。相信佢對「黃金寶貝」嗰份愛，尋日投射晒落去金童身上。

咁嘅日子，金句王又點少得金句。小加話自己年輕時選咗文科，最怕人話「學好數理化，走遍天下都不怕」，不過依家可以改口「黃金美元人民幣，走遍天下都不怕」咁話。

對金童咁早起身，但對住閃光燈都咁精靈。當然啦！報酬係金幣……朱古力嘛！

余絲韻