絲絲講場：數字王國操控蜘蛛俠老竇？

無錯，蜘蛛俠有個老竇叫史丹利（Stan Lee），佢亦係好多超級英雄嘅阿爸，Iron Man、X-men、雷神、奇異博士、神奇4俠等都喺佢手上誕生，事關史丹利就係美國漫畫公司漫威（Marvel）嘅角色設計師。

點解佢畀人捉住？要先講捉咗佢嘅數字王國。數字王國由過去主力做荷里活特效製作，轉型到近年發展虛擬實境（VR），早前利用虛擬人技術（Digital Avatar），為已故歌手鄧麗君舉辦虛擬音樂會，將鄧麗君呈現出嚟。

公司最近有新搞作，為顯示佢哋點將特效技術普及化應用，尋日發布會佢哋行政總裁謝安就捉埋Marvel之父史丹利……個虛擬人示範新技術。

搵史丹利製虛擬人

示範影片見到左下角嘅操控員講咩、做咩表情，「史丹利」都即時跟住講、跟住做，現場嘉賓睇到拍晒手掌。

謝安話，透過機器記錄低面部特徵、肌肉紋理動作同表情，再配合特效技術，鏡頭下任何人都可以扮成其他人，唔使好似電影後期製作咁要貼感應貼落面。

今次史丹利嘅真身確有出到力，數字王國之所以請得郁咁勁嘅猛人幫手，同公司前主業好有關係。事關數字王國做開電影後期製作，同史丹利幾好交情，所以先請到佢嘅真身去洛杉磯辦公室幫手搞個虛擬分身。

絲絲諗，日後人人「易容」無難度，想要N個虛擬分身都得，到時虛假難分，地球會唔會真係有危機……

余絲韻