Market Insight：石油股基本面待改善

畢竟「七一」過後，維穩效應已成過去，債券通又已經啟動，短線都冇咩特別重大利好消息跟尾。

地緣政治風險回升

反觀朝鮮半島戰雲密布，北韓高調宣布成功發射洲際彈道導彈，地緣政治風險上升。昨晚美股休市，未能反映情況，「侵侵」就在社交平台呼籲中方向北韓施壓，內部事宜諸事不順的「侵侵」，會唔會鋌而走險「還拖」以彰大美國主義威信？不得而知，惟事情發展下去，似乎摩擦已經係在所難免，投資者別輕視相關風險。

市場上的聰明錢似乎早着先機，國際油價昨日已連升八日，倫敦布蘭特期油試叩每桶50美元大關。基本面方面，美國油田服務數據回軟，或顯示在油價低迷下頁岩油生產商經營困難，大行瑞銀就預計，下半年國際油價或可重上每桶60美元大關。

老實講，三桶油估值極低殘係事實，但係咪可以有好大幅的反彈？古勝睇好短線技術性反彈，但就認為中長線需要更多基本因素配合才能確認轉勢。

中石油啱短線博反彈

「三桶油」之中，中海油（00883）股價對油價敏感度較高，若然睇好油價持續反攻，可首選中海油。至於中石化（00386），在油價跌浪中，表現跑贏同業，皆因有一定比例的下游業務；當處於油價反彈浪時，照計中石化股價反而會落後於同業。

然而，「三桶油」中，短線在下都係屬意中間派的中石油（00857），今年三月以來股價反覆向下期間，每次反彈都未能企在20日線超過三個交易日。

昨日中石油即市一度重上20日線，收報4.9元，不妨留意周內餘下交易日的表現，若能以大成交上破20日線並企穩其上，則反彈目標可上移至5.4元水平；但若再度食「彈散」，就要有待回試4.5至4.7元區域承接才有短線操作空間。

騰訊未宜心急撈貨

港股成個六月維持在高位唔上唔落，呢種情況唔會長期持續，昨日魚缸就來個突襲，似要開個單邊市。跌市禍首係騰訊（00700），旗下熱賣遊戲被官媒批評為「陷害人生」，騰訊股價即跌4%，一度下試50日線支持，市值蒸發千億元，而相關購證及牛證價格更加係大插水，一路買單邊向上的玩家被殺個措手不及！

照計官媒評論發炮，唔會咁快就了事，短線冇貨喺手，仲係睇定啲，唔好急於入市撈貨。

古勝認為，騰訊係商業機構，開發商業產品當然係「利」字當頭，之但係喺社會角度，企業營商都有道德底線，何況喺內地呢個咁特別的市場！普普通通一個網民的批評未必咁大影響，但批評出自官媒評論則不可視為等閒。今次事件會唔會引發更多關於網遊手遊市場發展更多的討論，要拭目以待，但相信騰訊點都要做番啲嘢，以避免輿論升溫，令自己處於不利位置。

故此，昨日股價大成交急跌，顯示部分玩家選擇減磅，並不難理解，而一隻強勢股進行調整，一係就好快完成，一係就進行一次較大調整。

不過，要補充一句，騰訊股王身份無變，低位坐上嚟的長線捧場客可以繼續坐，平常心看待調整浪的出現。當然，若短炒相關輪證損手，最好忍忍手睇定啲，唔好自亂陣腳心急入市加注博翻身，正所謂「財不入急門」﹗

古勝