絲絲講場：金融人轉戰IT因阿頭「縮骨」？

國際獵頭公司羅盛諮詢出報告，佢哋訪問咗300位具MBA背景兼有6至10年經驗嘅金融專才，發現50%華爾街中高層考慮劈炮，仲有20%打算離開金融界！

「須感覺到被重視」

點解唔做金融轉做IT？有受訪專才話，科企講「We care about you」，一聽到，歸屬感同自我價值返晒嚟，「金融界淨識發花紅，唔係人人睇錢，我要係感覺到被重視！」亦有人話「喂，我唔止係本Pitchbook喎！」（Pitchbook可以話係投行嘅招標書，內容介紹自己、做過啲乜、講埋收費標準等，用來招生意）

港專才：老闆共同進退

有人嫌金融阿頭唔夠硬淨，咩都話「保持中立」一味縮，唔似IT大佬有立場、會企出嚟撐。

香港專才又點睇？復星資本執行總經理葉浩文話，「咁多年接觸過好多金融人，老闆同員工稱兄道弟，共同進退，有錢齊齊搵。之前有投行裁員，成條Team cut咗，都見到啲阿頭一搵到好路數，會預埋班細。」

法興證券上市產品銷售部副總裁蔡秀虹亦話，「金融業唔係年年好景，但唔會話你幫公司賺到錢先對你好，大家幾時都咁Friend。亦因為咁，我條Team嘅人做咗好耐都唔願走。平日上司都畀好大自由度我哋，有家庭嘅員工有時可以早啲放工。」

至於曾考過特許金融分析師（CFA）兼做過大行分析員嘅洞視科技創辦人兼行政總裁陳敬倫就話，市場對洞視依家做緊嘅大數據分析有剛性需求，係佢決定跳出金融圈創業嘅主要動力，不過，尋求更大更靈活嘅發展空間，為金融科技同下一代出一分力，都係佢出走嘅原因。

余絲韻