Market Insight:內房股減磅 另覓他選

回顧六月,恒指高低位為25,557點及26,090點,成個月得五百幾點波幅。上周期指結算、基金半年結以及回歸二十年的維穩行情,統統告一段落,展望港股本周開始,逐步回歸基本,踏入七月開大定開細,應該好快會有答案。

上半年港股最後一個交易日,並無好似預期咁升破兩萬六關口,反而臨尾香,恒指跌200點收報25,764點,缺少咗騰訊(00700)及滙豐控股(00005)成分的國指繼續斯人獨憔悴,跌67點報10,365點。

吼A股入摩受惠股

香港股市無乜性格,一向二仔底死跟,中國好香港好,上半年A股成為全球表現最差股市之一,恒指獨自強勁,講到底,都係多得美國科技股狂潮以及美國對銀行監管鬆手,益咗兩隻重磅股騰訊及滙控。

阿爺落重藥治內地樓市泡沫,近月「北上廣深」等一線城市二手樓價及租金經開始見掉頭往下,政府的有形之手會否鳴金收兵?上半年內房股偷步炒,就係大孖沙們預期年底前調控交到成績,有機會減辣,部分大型內房股上半年已預先透支升幅,但萬一唔減辣,下半年能否繼續抗抵地心吸力,頓成問號。

上半年升得多的內房,應酌量減磅,咁邊類股可睇高一線?古勝認為受惠A股入摩,券商有機會跑出,而內地債息回升,大型保險股都可得益,騰訊上半年累積升幅驚人,部分上半年一直未見鑊氣的中資科創企業,好似金蝶國際(00268)以及網龍(00777)一類都可重新留意,或會有意外收穫。

石油板塊繼續冇運行

獅王滙控被大摩唱好的餘溫猶在,周五中段谷一浸見74.2元,創今浪新高。炒鬼見股價衝唔破一三年高位阻力74.3元,午後縮番轉頭,落到72.65元收市,倒跌0.15元,成交52億元,反映依然是好淡大戶廝殺的場地。

總結上半年,恒指升17.1%,升得最勁的三隻藍籌分別係二月份染藍的吉利汽車(00175)升127%,騰訊(00700)升47.1%,獲基金股東私有化的百麗(01880)升41.2%。

去年OPEC減產效果退潮,即使剛把減產協議延長九個月,不過非油組國狂掘賤賣無王管,美國頁岩油復辟,中國爆出幾年內可燃冰可以開始大量開採,都令油市無運行。油價級級落,中石油(00857)及中海油(00883)成為藍籌升幅榜倒轉數的首兩位,分別跌17.3%及11.8%。

美股高處不勝寒

承先啟後,港股已連升六個月,七月仲可唔可以繼續開大?照睇下半年政經環境,暗湧確實比上半年多,也沒有上半年般明朗。從美歐英日央行的動態所見,全球大水猛灌日子可能已經結束,近日多國央行大員打開口牌,研究為現行寬鬆政策打修正球,美國率先將縮表放入議程之內。

經濟表現不似預期

美國華爾街的「特式升市」已係強弩之末,「侵侵」在任快將半年,未見令經濟更加強大,反而就業及物價有見頂先兆,期間美國未有理會西方盟友反對,一意孤行退出TPP及《巴黎協定》,「侵侵」呢位生意佬可能慣咗受軟唔受硬,外交手段一塌糊塗。

美國唔單止放棄擔任世界警察的角色,更一百八十度轉向封關自保新格局。展望第三季,「侵侵」的稅改方案,快將交上國會審議,民主黨必然舉腳反對,共和黨亦怕是口和心不和,加埋美國快將又到財政懸崖,以及縮表部署兩宗大事,任何閃失,企在高位的美股肯定有得震無得瞓。

古勝