「逆水行舟，不進則退。」這句說話套用於港交所（00388）於全球交易所新股集資總額排名上，就最合適不過。安永日前發表，去年「冧莊」成為集資王來衞冕的港交所，於今年上半年為止竟不敵紐約同滬、深，而痛失三甲，跌落梗頸四！
睇番breakdown，其實上半年於香港上市的公司宗數有69家，合共集資538億元，分別增長82%同24%。牌面唔差喎，排名方面點解會咁失威？睇埋先啦！當中創業板上市的宗數自○三年至今首次超越主板呀，即係全配售呀，10億、8億嗰批呢！回顧去年，單是郵儲銀行（01658）就已經貢獻600億元過外了，即相當於今年上半年69家公司的總和仲有找呀！這個故事，又說明了「蛇無頭不行」這個道理喇！
其實，安永於去年十二月發表一六年年度報告的時候已經指出：港交所之所以可蟬聯，主要是因為滬深停批IPO，對手未發力啫！他們果真有先見之明呀！事實上，今年中證監批IPO批到好似趕住交數咁款，就是連股指下滑，非大盤股的股價逢底破底，大媽們怨聲載道都好少理，就是要急起直追。唔係點解滬、深兩地的上市宗數可以突破246家，按年升超過三倍呀？
展望下半年，李小加的責任就是要找一個「蛇頭」返嚟！去哪裏找呢？內地的話可以是陸金所（市傳集資390億元）、眾安保險（市傳集資140億元）又或者是螞蟻金服（市傳集資780億元）。先不計一直只聞樓梯響的陸金所喇，眾安保險是馬雲、馬化騰同馬明哲的大茶飯，後兩者的旗艦都落戶香港喇，希望他們勸得掂馬雲啦！
至於外圍，就要靠沙特阿美（市傳集資1,000億至1,500億美元！）所以話，全年埋單誰領風騷呢？一定是「得阿美，得天下！」但過去有幾多外企來港上市都是遭市場冷待，你是阿美，你來不來？
富昌金融研究部總監 譚朗蔚（作者為註冊持牌人士）