Market Insight：染藍憧憬吉汽做樣辦

舜宇當選呼聲最高

綜合市場的睇法，有機會「染藍」的股份包括舜宇光學（02382）、長城汽車（02333）及香港電訊（06823），其中以流通量以及今年以來的股價表現來推測，舜宇應該係大熱之選。至於冷門之選，論市值中國恒大（03333）達1,834億元，但不明朗因素係涉及回歸A股的重組進展。

吉利汽車（00175）被「染藍」後，股價真係升唔停，昨日又創新高16.46元，收報16.16元，升4%，成交17億元。公司宣布擬將每手股數由五千降至一千，即係每手入場門檻下降，相信會更有利交投及擴大股東基礎。到底會係有利大戶派發抑或真係益到小股民上車？就要做事後孔明了，關鍵係公司能否保持住良好的基本面及穩定的派息，但相信好似騰訊咁，股份拆細完仲可以不斷攀升的，印象中真係為數唔多。

估值超高 終須一跌

諗住半年結前魚缸大局已定，都係偏靜，點知昨日上晝突然出現多隻股仔股價接連暴瀉，主板十大跌幅榜股份跌幅達五成至九成！

咁多股仔被人洗白白，有人輸大錢，亦意味有執平貨的機會！

魚缸傳聞多多，其中一個版本係話某新進莊家資金鏈出問題，旗下按倉股仔畀人推出午門「斬」倉，在追孖展以及沽貨補孖展的連鎖效應下，股仔爆煲潮擴散。其中聯旺集團（08217）午後終於不敵地心吸力，股價失守10元關，一直插到落低位見0.91元，收報1.06元，跌89%，成交5,457萬元，但市值都仲有13.2億元。

你問古勝跌夠未？在下都唔知問邊個？反正估值超唔合理，要跌的終歸要跌，講完。

撈貨要有輸晒準備

講完啲不快事，又講啲好笑嘢。昨日下晝股友最常問的一句係「你今日執咗幾多家上市公司？」事緣昨日細價股大面積崩盤，當中唔少都變成仙股，市值仲低過殼價，股友笑言敢博的話成家上市公司都買到！

就睇番跌幅榜中，有兩隻吸引到唔少老散出手。第一隻係中國集成控股（01027），隻股上午十一點幾居然落到1仙淨沽，當買末日輪小注博一博冇頻撲，結果下晝反彈過上2仙樓上，夠膽博一倍利潤即日袋袋平安。

另一隻值得一提的係品質國際（00243），股價在臨近中午收市前落過7.5仙，但呢隻股建議派發特別股息每股0.133元，將於下月十四日召開的特別股東大會審議，殼價加埋收息，隻股一毫唔使就買得到，吸引炒家落場做清兵，結果隻股收報0.285元，跌56%，但一毫子樓下撈貨的可即場收割。

當然，咁樣博法主要風險係派息會唔會順利獲得通過，只係呢啲極短線的操作又唔使考慮咁多。但Double or Nothing的玩法太高風險，唔係人人啱！

古勝