絲絲講場：格力董明珠「Phone」騷有因

「不是因為我美或不美！」

好明顯見得到唔關「美不美」事，點解開機畫面要咁先？點？解？董大姐話佢係因為「代表一種承諾而出現」！

佢話見好多廣告都係明星代言，啲消費者都以「崇敬、信任」嘅態度選擇產品，結果買番去用先發覺係另一回事，傷害晒消費者嘅信任。於是佢話自己要畀一個真實承諾消費者，「我是這個企業的代表，我的講話最管用」，話如果大家覺得貨不對辦，可以去投訴，「我可以賠你，不是因為（我）自己美或是不美」咁話。

格力手機嘅推出，確實都幾轟動。聽講第三代「色界」早排於格力官網上架開賣當日，只賣出咗5部，震撼成個手機界。依家銷量當然唔止啦，想知多幾多？閣下自己上網睇。

多賺23% 全體股東有錢分

話時話，格力電器近日股價走勢真係唔錯，由三月尾約每股30元（人民幣‧下同），升至昨日收報嘅41.43元，三個月升咗38%。佢哋去年純利增長23%去到154.2億元人仔，仲向全體股東派錢，每10股派18元！

絲絲記得董大姐曾公開同大家講過「一個人最大的成功在於自信，而不是身家或美貌」，大家見到未，董大姐就係最佳人辦。最後畀多個溫馨提示大家，就係聽講第一次開機激活先會見到董大姐，之後就唔會再見到o架喇。

余絲韻